कोरोनाको दोस्रो भेरियन्टले थप महामारीको रुप लिइरहँदा देशभर एक पछि अर्को जिल्लाले लकडाउन गर्न थालेका छन् । पृथ्वी राजमार्गले ठूलो क्षेत्र ओगटेको जिल्ला गण्डकीको तनहुँमा पनि भोलि बुधबारदेखि निषेधाज्ञा घोषणा भएको छ ।

जिल्ला कोभिड संकट व्यवस्थापन केन्द्र डिसिसिएमसीले दिएको सिफारिसका आधारमा तनहुँ प्रशासनले निषेधाज्ञा जारी गरेको हो । भोलिदेखि जारी लकडाउन वैशाख ३१ गते रातिसम्म लागु हुनेछ । तनहुँको ऋषिङका वडा नम्बर एकमा मात्र निषेधाज्ञा लागु हुनेछ भने घिरिङका सबै वडा क्षेत्रमा निषेधाज्ञा हुनेछैन ।

प्रमुख जिल्ला अधिकारी सागर आचार्यको अध्यक्षतामा बसेको केन्द्रको बैठकले भोलि मध्यरात १२ बजेबाट लागू हुने गरी वैशाख मसान्तसम्म अत्यावश्यकबाहेकका आवतजावतमा रोक लगाउने निर्णय गरेको हो ।

अत्यावश्यक वस्तुको खरिदका लागि भने समय दिने गरी निषेधाज्ञा आदेश जारी भएको छ । अत्यावश्यक सामग्रीको खरिदका लागि विहान ५ देखि ९ र साँझ ५ देखि ७ बजेसम्म समय तय भएको प्रमुख जिल्ला अधिकारी आचार्यले हस्ताक्षर गरेको विज्ञप्तिमा उल्लेख छ ।