गण्डकी प्रदेशकी नवनियुक्त प्रदेश प्रमुख सीता कुमारी पौडेलले पदभार ग्रहण गरेकी छिन् । उनले बुधबार पोखरास्थित प्रदेश प्रमुखको कार्यालयमा पदभार ग्रहण गरेकी हुन् ।

राष्ट्रपति विद्यादेवी भण्डारीले उनलाई सोमबार प्रदेश प्रमुख नियुक्त गरेकी थिइन् । उनले सोमबार नै पद तथा गोपनीयताको सपथ लिएकी थिइन् ।

त्यसपछि मंगलबार पाेखरा आएकी उनले आज पदभार ग्रहण गरेकी हुन् । कास्कीकै पुरूञ्चाैरमा जन्मेकी उनकाे परिवार चितवन बसाईं सरेका हुन् ।

अखिल नेपाल महिला संघकी अध्यक्ष रहेकी उनी प्रधानमन्त्रीका सल्लाहकार समूहमा थिइन् । प्रधानमन्त्री केपी शर्मा ओलीले माओवादी काेटाबाट प्रदेश प्रमुख भएका अमिक शेरचनलाई हटाएर पाैडेललाई नियुक्तिका लागि राष्ट्रपतिसमक्ष सिफारिस गरेका थिए ।

गण्डकीमा साढे ३ वर्षमा ३ जना प्रदेश प्रमुख बनेका छन् । शेरबहादुर देउवा सरकारले बाबुराम कुँवर, एमाले माओवादी एकीकृत हुँदाकाे नेकपा सरकारले अमिक शेरचन र एमाले सरकारले पाैडेललाई प्रदेश प्रमुख बनाएकाे हाे ।

मन्त्रिपरिषदको सिफारिसमा राष्ट्रपति भण्डारीले गण्डकीमा पौडेलसँगै सुदूरपश्चिमको प्रदेश प्रमुखमा गंगाप्रसाद यादवलाई नियुक्त गरेकी थिइन् ।