केन्द्रमा जसपाको हालत जे छ, त्यसलाई माथ दिने गरी गण्डकीमा राष्ट्रिय जनमोर्चा अघि बढेको छ । गण्डकी प्रदेशसभामा ३ सदस्य रहेको जनमोर्चामा नयाँ सरकार गठन सम्बन्धमा विवाद सतहमा आएको हो ।

सचेतक पियारी थापाले आफ्नो लेटरप्याडमा पत्र लेख्दै अन्य दुई सांसदलाई काँग्रेसका संसदीय दलका नेता कृष्णचन्द्र पोखरेल नेपालीलाई मुख्यमन्त्रीमा मतदान गर्न ह्वीप जारी गरेकी छन् ।

पियारीले सचेतकको हैसियतमा संसदीय दलका नेता कृष्ण र सांसद खिमविक्रमलाई ह्वीप जारी गरेकी छन् । तर, संसदीय दलको बैठक नै नबसेको दुई सांसदहरुले प्रतिक्रिया दिएका छन् ।

जनमोर्चा संसदीय दलका नेता कृष्ण थापा र खिमविक्रम शाही एमाले सरकारतिरै लचिलो थिए । पियारी थापा मात्र मुख्यमन्त्री विरुद्ध खरो रुपमा उत्रेकी थिइन् ।

उसो त, पियारी केन्द्रकै निर्देशनमा अघि बढेको बुझिएको छ । अहिले उनी कोरोना संक्रमणपछि होम आइशोलेशनमा छिन् । जनमोर्चा अध्यक्ष चित्रबहादुर केसीले कांग्रेस नेतृत्वकै सरकारलाई समर्थन दिने पार्टी निर्णय गरेको बताइरहेका छन् ।

जनमोर्चाका सांसदलाई फकाउन केन्द्रबाट जनमोर्चाका महासचिव मनोज भट्ट पोखरा आएको हप्ता नाघिसकेको छ । तर, एमालेको सहयोगविना चुनावमा नजितिने, काँग्रेससँग दशकौं दुश्मनी रहेका कारण पनि बाग्लुङे जनमोर्चा नेताहरु केन्द्रको निर्णय मानिरहेका छैनन् । सामाजिक सञ्जालमा पनि केन्द्रको निर्णयमा खरो प्रतिवादमा बाग्लुङे जनमोर्चाका कार्यकर्ताहरु देखिएका छन् ।

नयाँ सरकार कहिले ? पियारीलाई हतारो, कृष्ण र खिमविक्रम अन्कनाउँदै