पोखरा महानगरपालिकाले गठन गरेको लेखनाथस्थित तालहरुको मापदण्ड सम्बन्धी अध्ययन समितिले प्रतिवेदन बुझाएको छ ।

डाक्टर सोमनाथ सापकोटाको संयोजकत्वमा गठित समितिले तयार पारेको लेखनाथस्थित तालहरुको मापदण्ड सम्बन्धी अध्ययन प्रतिवेदन पोखरा महानगर प्रमुख मानबहादुर जिसीलाई आइतबार बुझाएको हो । संयोजक सापकोटाले महानगर प्रमुख जिसीलाई प्रतिवेदन बुझाएका हुन् ।

समितिको सदस्यमा खिमलाल गौतम, हरिबहादुर भुजेल, अनुप गुरुङ, आमन्त्रित सदस्य गगन ढकाल, जगन्नाथ कोइराला र सदस्य सचिवमा आशोककुमार सुनार रहेका थिए । प्रतिवेदनमा तालको मापदण्ड, तालहरुको विशेषता अनुसार सौन्दर्यकरण र तालको दीर्घकालीन संरक्षणलाई जोड दिएर समितिले प्रतिवेदन तयार पारेको छ । तालको मापदण्ड परिमार्जन गर्न समितिले सुझाव पनि दिएको छ ।

प्रतिवेदन बुझाउने कार्यक्रममा उपप्रमुख मञ्जुदेवी गुरुङ, प्रमुख प्रशासकीय अधिकृत महेश बराल, महानगरका सूचना अधिकारी भरतराज पौडेल, समितिका सदस्यहरु लगायतको उपस्थिति थियो ।