भरतपुर – कमिसनको हिसावकिताव नमिल्दा कोरोना भाइरस विरुद्धको भ्याक्सिनको आयात रोकेको आरोप लागेका व्यवसायी सुरज बैद्यको कम्पनीले नापतौलमा ठगी गरेको पाइएको छ ।

चितवनमा रहेको वेलहोप एग्रिटेकले ५० किलो लेखिएको बोरामा कम तौलको दाना बिक्री गरेको पाइएको भन्दै भरतपुर महानगरपालिका वडा नं -२३ को वडा कार्यालयले जिल्ला प्रशासन कार्यालय चितवनलाई एक पत्र मार्फत जनाएको छ।

पत्र अनुसार भरतपुर -२३ का कुखुरा व्यवसायी मनोज कुमार बोहोराले उल्लेख गरिएको भन्दा कम तौल भएको भन्दै उजुरी दिएका थिए । बोहोराको उजुरी पछि वडा नं. २३ का वडा अध्यक्ष नरिनारायण पौडेल सहित सम्बन्धीत कार्यालय, स्थानीय र सुरक्षा निकायलाई समेत साक्षी राखेर दाना तौलिदां उल्लेखित भन्दा कम तौल देखिएको थियो ।

उद्योगले तौलमा ठगेको देखिएपछि कानुनी उपचारका लागि वडा कार्यालयले सिफारिस गरेको हो ।

विभाग मातहतको बीरगञ्जस्थित कार्यालयले किसानलाई बेचेको कम तौल भएका १० बोरा दाना जफत गरी उद्योगविरुद्ध अदालतमा ठगी मुद्दा हाल्ने भएको छ ।

गुणस्तर विभागका अनुसार तौल ठगीको आरोपमा स्ट्याण्डर्ड नाप तौल ऐन २०२५ अनुसार ठगीको आरोपमा उद्योगको अध्यक्षलाई नै मुद्दा चल्ने कानुनी प्रवधान छ । ठगी पुष्टि भए कम्पनीका अध्यक्षलाई ३० हजार रुपैयाँ जरिवाना र ३ वर्ष कैद हुने कानुनी प्रावधान छ ।