पोखरा । नेपाली कांग्रेसका नेता रामजी कुवँरको निधन भएको छ । कोरोना संक्रमणका कारण काठमाडौंमा उपचार गराइरहेका ६५ वर्षीय कुवँरको आज निधन भएको काँग्रेस कास्कीका प्रवक्ता नवीन सिग्देलले जानकारी दिए ।

कुँवरको कोभिड निको भएपनि स्वास्थ्यमा सुधार भएको थिएन । उनको उपचारकै क्रममा शिक्षण अस्पताल, काठमाण्डौमा निधन भएको सिग्देलले जनाए । ट्रेड युनियन कांग्रेसका बरिष्ठ उपाध्यक्ष कुवँर ४ वर्ष अघि पोखरा महानगरको मेयरका प्रत्यासी थिए ।

२०१३ साल असोज ४ गते पोखराको बैदाममा जन्मिएका कुँवर वि.सं. २०३६ सालमा नेपाली मजदुर आन्दोलनलाई केन्द्रमा राखेर राजनीतिमा होमिएका थिए । कुँवर कास्की क्षेत्र नं. ३ सभापति हुँदै पार्टीका आमन्त्रित केन्द्रिय सदस्य पनि बनेका थिए ।

पार्टीको १० औं महाधिवेशनदेखि कुँवर लगातार महाधिवेशन प्रतिनिधि र महासमिति सदस्य थिए । कुँवर नेपाल ट्रेड युनियन कांग्रेसका सस्थापक केन्द्रिय सदस्य हुन्। उनी सचिव, उपाध्यक्ष हुँदै लगातार दुई पटकसम्म वरिष्ठ केन्द्रिय उपाध्यक्षमा आसिन रहे । २०३६ साल र दोस्रो जनआन्दोलनमा उनी प्रहरीको हिरासतमा पनि परे । वल्र्ड काँग्रेसमा सहभागिताका साथै कामका सिलसिलामा दुई दर्जन मुलुक उनले भ्रमण गरिसकेका थिए ।

पब्लिक हेल्थ विषयमा भारतबाट स्नातक गरेका थिए । विभिन्न स्वास्थ्य संघसंस्थामा आजीवन सदस्य, विद्यालयहरुमा आजीवन सदस्य समेत थिए । २०५० मा स्वास्थ्यकर्मीको जागिर छाडेपछि त्यसयता उनी निरन्तर पार्टीमा क्रियाशील थिए । मिलनसार र नम्र स्वभावका कुँवर ईमान्दार कार्यकर्ताका रुपमा चिनिन्छन् ।

लामो समयदेखि पार्टीमा योगदान गरेका कुँवरलाई सिफारिस भएका ३३ जना नाममध्येबाट कांग्रेसले मेयरको उम्मेदवारका रुपमा छनौट ग¥यो । तर, उनी नेकपा एमालेका मानबहादुर जिसीसँग पराजित भएका थिए ।