नवलपुर । दाउरा काट्न भनी घरबाट हिंडेका युवक मृत अवस्थामा फेला परेका छन् ।

लमजुङ जिल्लाको खूदी घर भइ हाल नवलपुर जिल्ला देवचुली नगरपालिका वडा नं -२ केउरेनी बस्दै आएका २७ वर्षीय विजय भण्डारी मृत अवस्थामा फेला परेको प्रहरी नायव उपरीक्षक श्रवण कुमार विकले जानकारी दिए।

विकका अनुसार भण्डारी शुक्रबार बिहान ६ बजेको समयमा दाउरा काट्न भन्दै घरबाट निस्किएका थिए ।अबेरसम्म पनि उनी नफ़र्किएपछि परिवारले खोजतलास गर्दै जाँदा देवचुली -१२ लक्ष्मीपुर स्थित बौलाहा खोलाको किनारमा उनको शव फेला परेको थियो ।

घटनाको जानकारी लगत्तै पुगेको प्रहरीको टोलीले घटनाका सम्बन्धमा आवश्यक अनुसन्धान शुरु गरेको जनाएको छ।

यस्तै, कावासोती -१ हात्तीखोर निवासी ५० वर्षीय दुर्गा मल्लको शव खोलामा अड्किएको अवस्थामा फेला परेको छ।

कावासोती -१४ हेंगौली स्थित केरुङे खोलामा पुरुषको शव अड्किएको छ भन्ने खबर पश्चात पुगेको प्रहरीको टोलीले अनुसन्धान गर्दा उक्त शव हात्तीखोर निवासी ५० वर्षीय दुर्गा मल्लको भएको खुल्न आएको जनाएको छ।

हाल घटनाका सम्बन्धमा आवश्यक अनुसन्धान गरिरहेको प्रहरीले बताएको छ।