काठमाडौँ । नेकपा (एमाले)का अध्यक्ष केपी शर्मा ओलीले वर्तमान सरकारले जारी गरेको अध्यादेश असंवैधानिक भएको टिप्पणी गरेका छन् ।

सरकारले संविधानको मर्मविपरित कुनै दल विशेषलाई फुटाउने नियत राखेर अध्यादेश ल्याएकोमा आपत्ती जनाए ।

‘मेरो पालामा पनि अध्यादेश ल्याएको हो, तर मध्यरातमा संसद अधिवेशन अन्त्य गरेर भोलिपल्टै अध्यादेश ल्याएको थिइनँ,’ च्यासलमा आयोजित पत्रकार सम्मेलनमा बोल्दै ओलीले भने, ‘देश र जनताका लागि अत्यावश्यक परेका बेला अध्यादेश ल्याउन पाइन्छ तर एमालेलाई विभाजन गर्न सोधेरै कति प्रतिशत राख्दा हुन्छ भनेर अध्यादेश ल्याइयो ।’

कुनै पार्टी विशेषलाई फुटाउने ढंगले आफूले अध्यादेश जारी नगरेको उनले दाबी गरे।

‘कुनै पार्टीभित्र असाधारण अवस्था थिएन। कुनै पनि पार्टी फुट उन्मुख थिएन। हामीले दल र संसद् भनेका थियौं। त्यो हुँदा के अप्ठ्यारो भयो भयो नेताले चाह्यो भने डेढ सयलाई १५ सय बनाइदिएपछि कसरी विभाजन हुन्छ?,’ ओलीले भने, ‘त्यसैले अमूर्त बनाउनुहुँदैन भनेर वा राखिएको थियो। सांसदको स्वतन्त्रको अधिकारको व्यावहारिक कार्यान्वयनका लागि अध्यादेश ल्याइएको थियो। अहिले त्यस्तो स्थिति हो र? १२ बजे राति अधिवेशन अन्त्य हुन्छ, भोलिपल्ट अध्यादेश आउँछ।’