काठमाडौँ । नेकपा एमालेका अध्यक्ष केपी शर्मा ओलीले माधवकुमार नेपालसहितका नेताले अर्को पार्टी गठन गर्दैमा केही फरक नपर्ने बताएका छन् ।

शनिबार युथफोर्सद्वारा ललितपुरमा आयोजित कार्यक्रममा यस्तो बताएका हुन् । उनले भने– ‘एक दुई पात पहेँलिएर खस्दैमा रुखलाई केही फरक पर्दैन । रुखमा नयाँ–नयाँ पालुवा पलाउँदैछन् । नयाँ नयाँ हाँगा हाल्दैछन् ।’

उनले पार्टी फुटेको नभई चोइटिएको बताएका छन्। उनले फुट्नु र चोइटिनु फरक कुरा भएको भन्दै अहिले केही बिग्रिएका मान्छेले पार्टी छाडेको बताए ।

‘पार्टी फुट्यो भन्छन् कतिपयले । फुटेको होइन, केही मान्छे पतित भएका हुन्, बिग्रिएका हुन्। ती बिग्रिएका मान्छेले पार्टी छाडेका हुन्। अलिकति चोइटिएको हो भन्न सक्नुहुन्छ। फुट्नु र चोइटिनु फरक कुरा हो। भाँडाको छेउमा अलिकति चोट लाग्नसक्छ। अलिकति चोइटिनसक्छ। फुटेपछि गयो! पक्लक्कै हुन्छ। चोइटिएर पकाउन पनि खाँचो हुँदैन। खान पनि खाँचो हुँदैन,’ उनले भने।