पोखरा । नेपाल कम्युनिस्ट पार्टी एकीकृत (समाजवादी)ले गण्डकी प्रदेश कमिटी निर्माण गरेको छ । प्रदेश इञ्चार्ज केशवलाल श्रेष्ठको प्रमुख आतिथ्यतामा भएको बैठकले प्रदेशका अग्रणी नेता तुल बहादुर गुरुङको अध्यक्षतामा प्रदेश कमिटी निर्माण गरेको हो ।

त्यसैगरी, प्रदेश कमिटीको सचिवमा प्रतापलाल श्रेष्ठ, उपसचिवमा श्रीनाथ बरालसहित १३५ सदस्यीय प्रदेश कमिटी निर्माण गरेको छ ।

गण्डकी प्रदेश साविक धौलागिरी अञ्चल र गण्डकी अञ्चल मिलेर बनेको हुँदा उपाध्यक्ष र २ सचिव पद अहिलेलाई खाली राखिएको छ ।

साथै, बैठकले १० बुँदे ठोस कार्यक्रमका साथ युद्ध स्तरमा कमिटीहरु निर्माण गर्ने र पार्टीजीवनलाई थप व्यवस्थित बनाउँदै लैजाने निर्णय समेत गरेको छ ।

गण्डकी प्रदेशका अध्यक्ष गुरुङ अनेरास्ववियुको दुई कार्यकाल केन्द्रिय अध्यक्ष सम्हालिसकेका र इमान्दार तथा निष्ठावान नेताको छवि बनाउन सफल नेता मानिन्छन् । गुरुङ पूर्व मन्त्री पनि हुन् ।