पोखरा । लेखनाथ उद्योग वाणिज्य संघको नयाँ नेतृत्व टीम टुंगो लागेको छ । संघको २५ औँ साधारणसभा तथा १३ औं महाधिवेशनले नयाँ नेतृत्व चयन गरेको हो । शनिबार सम्पन्न मतदानको मतगणना सोमबार राति टुंगिएको छ ।

यसअघि नै अध्यक्ष पदमा छत्रधर आत्रेय निर्विराेध भइसकेका छन् । वरिष्ठ उपाध्यक्ष पदमा विनोद श्रेष्ठ विजयी भएका छन् । उनले प्रतिष्पर्धी भरतकुमार अधिकारीलाई ५८ मतले पछि परे ।उनले कुल ८ सय १ मत प्राप्त गरेका थिए भने अधिकारीले ७ सय ४३ मत प्राप्त गरे ।

प्रथम उपाध्यक्ष पदमा राजेन्द्र ओझा विजयी भएका छन् । उनले प्रकाशलाल श्रेष्ठ लाई १ सय ५२ मतले पछाडि पारेका हुन् । ओझाले कुल ८ सय ५७ मत ल्याउँदा श्रेष्ठले ४ सय ७९ मत ल्याए ।

संघको द्वितीय उपाध्यक्ष पदमा गोपिचन्द्र बाँस्तोला विजयी भएका छन् । उनले शैलेन्द्रमोहन भट्टराईलाई १ सय ४७ मतले हराएका हुन । बाँस्तोलाले कुल ८ सय ५३ मत ल्याउँदा भट्टराईले ७ सय ६ मत प्राप्त गरेका थिए । बाँस्तोला यस अघिका महासचिव हुन् भने भट्टराई कार्यसमिति सदस्य हुन् ।

उपेन्द्रराज सुवेदी ९राजु० ले ४ सय ६९ को फराकिलो मतान्तरले मेनुका श्रेष्ठलाई पराजित गर्दै महासचिव पदमा विजयी भएका छन । सुवेदीले अहिलेसम्मकै सर्वाधिक १ हजार १९ मत ल्याउन सफल भएका छन् भने श्रेष्ठले जम्मा ५ सय ५० मत प्राप्त गरिन् । सुवेदी यसअघि संघका उप–महासचिव पदमा रहेका थिए भने श्रेष्ठ कार्यसमिति सदस्य हुन् ।

यस्तै, जानुका अधिकारीले धिरजकुमार श्रेष्ठलाई पराजित गर्दै उपमहासचिव पदमा निर्वाचित भएकी छन् । उनले श्रेष्ठलाई ३ सय मतको फराकिलो अन्तरले पराजित गरेकी हुन् । अधिकारीले ९ सय ३३ मत प्राप्त गर्दा श्रेष्ठले ६ सय ३३ मत प्राप्त गरेका थिए । पदाधिकारीमा महिला पुगेको यो नै पहिलो पटक हो ।

यस्तै, भरतराज ओझाले प्रतिष्पर्धी रामजी पौडेललाई ९५ मतले पराजित गर्दै कोषाध्यक्ष पदमा विजयी भएका छन् । उनले ७ सय ५७ मत ल्याउँदा उनका प्रतिष्पर्धी पौडेलले ६ सय ६२ मत ल्याएका थिए । चुनावको दुई दिन अगाडि उम्मेदवारी फिर्ता लिएर पौडेललाई सर्मथन गरेका भिमबहादुर नेपाली ९काइँला० ले १ सय २८ मत प्राप्त गरे । अन्तिम अवस्थामा उम्मेद्वारी फिर्ता लिँदा यसको प्रत्यक्ष फाइदा ओझालाई पुग्न गएको छ । उम्मेदवारी फिर्ताको समय कटिसकेकाले उनको नाम मतपत्रमा थियो ।

सदस्य खुल्लातर्फ उम्मेद्वारी दिएका २० जनालाई पछि पार्दै ८ जनाले जित हासिल गरेका छन । विजयी हुनेहरुमा विक्रम कर्माचार्य, बुद्धिप्रसाद बाँस्तोला, ध्रुवबाबु भटृराई, इन्दिरा रोका, जिवन तिवारी, भरत थापा, पुष्पमणि भण्डारी र हरि बस्ताकोटी रहेका छन् ।

सदस्यमध्येबाट विक्रम कर्माचार्यले ९ सय ५८ मत ल्याएका छन् भने बुद्धिप्रसाद बाँस्तोलाले ८ सय ९२, ध्रुवबाबु भट्टराईले ८ सय २४, ईन्दिरा रोकाले ७ सय ९४, जिवन तिवारीले ७ सय २१, पुष्पमणि भण्डारीले ६ सय ७५, भरत थापाले ६ सय ७१ र हरि बस्ताकोटीले ६ सय २९ मत ल्याउन सफल भएका हुन् ।

यस्तै, महिला सदस्यमा उम्मेदवारी दिएका ५ जना मध्येबाट २ जना विजयी भएका छन् । विजयी हुनेहरुमा गंगाकुमारी मल्लले ८ सय ९५ मत प्राप्त गरेकी छन् भने रञ्जना बरालले ७ सय ९१ मत प्राप्त गरेकी छन् ।

यसअघि नै संस्थागत सदस्यमा रामबहादुर गुरुङ र एसोसिएट सदस्यमा मेघराज पौडेल निर्विरोध निर्वाचित भइसकेका थिए । विजयी उम्मेद्वारहरुलाई सोमबार राति नै विजयीको प्रमाणपत्र प्रदान गरिएको छ ।

तस्वीरः लेखनाथ खबर