गोरखाको आरुघाट गाउँपालिका १, मान्बु स्थित डुन्डुरेखोलामा बुधबार राति मिनि ट्रक दुर्घटना हुँदा चालककाे ज्यान गएकाे छ । घटनामा परी एक बालिका घाइते भएकी छन् ।

बा ५ ख १२३१ नम्बरको स्वोराज मिनी ट्रकका चालक धादिङ जिल्ला गंगाजमुना गाउँपालिका ७, पिठेका ३२ वर्षिय मनोज श्रेष्ठको घटनास्थलमै मृत्यू भएको हाे । ट्रकमा सवार सवारी धनी आरुघाट गाउँपालिका १ का ३५ वर्षिय राजकुमार गुरुङकी छोरी ३ वर्षीया दिब्या गुरुङ घाईते भएकी छन् । उनलाई विहीबार बिहानै एम्बुलेन्सबाट काठमाण्डाै लगिएकाे छ ।

श्रेष्ठले चलाएकाे मिनिट्रक राति १० बजेतिरकाे समयमा कच्ची सडकबाट करिब एक सय ५० मिटर भीरबाट खसेको इलाका प्रहरी कार्यालय आरुघाटका प्रहरी निरीक्षक सन्तबहादुर लामाले बताए ।

ट्रक बालुवा बोकेर आर्खेतबाट धुन्चेत जाँदै गरेको आर्खेतबाट मनाेज धमलाले जानकारी दिए । निरन्तरकाे वर्षातले बाटो बिग्रिएको र रातीको समयमा जोखिम मोलेर यात्रा गरेकाले दुर्घटना भएको प्रहरीले जनाएको छ ।

स्थानियका अनुसार उकालाे बाटाेमा पहिराे खसेकाे थियाे । पहिराे छल्दै ट्रक अघि बढ्दा भीरतिरबाट बाटाे भासिएकाे हाे । कमेरे माटाे बग्दा लाेड गाडी सिधै तल खसेकाे थियाे । बाटाे सफा गर्दै ट्रक अघि बढाउन सवारीधनी राजकुमार ट्रकबाट झरेका कारण उनी दुर्घटनाबाट बचे । ट्रकमा रहेका चालक श्रेष्ठ र नाबालिका छाेरी ट्रकसँगै खसेका थिए । बालिका र चालक ट्रकबाट उछिट्टिएका थिए ।

घटनास्थल पुगेका सुब्बा दाहालका अनुसार चालकले बालिकालाई पनि बचाउन सँगै लिएर ढाेकाबाट हामफाल्ने प्रयास गरेकाे हुनसक्ने अनुमान गरे । दुवै जना बीचमै अड्केका थिए । चालककाे टाउकाे र अनुहारमा गम्भीर चाेट लागेकाे छ । घाईते बालिकाकाे पनि टाउकाेमा चाेट लागेकाे छ भने अवस्था गम्भीर छ ।

उनलाई आरूघाट स्थित आरूचनाैटे प्राथमिक स्वास्थ्य केन्द्रमा प्रारम्भिक उपचार गरि थप उपचारका लागि काठमाण्डाै लगिएकाे हाे । चालक श्रेष्ठको शव पोष्टमार्टमका लागि प्राथमिक स्वास्थ्य केन्द्र आरुघाटमा राखिएको छ ।