पोखरा । पोखरा महानगरपालिका वडा नं. १९ पुरुन्चौरमा आयोजित निःशुल्क आँखा शिविरमा २९० जनाले सेवा लिएका छन् ।

पोखरा ५ स्थित स्वान्तसुखाय परोपकार प्रतिष्ठानले शनिबार पुरुन्चौरस्थित भारतीभवन स्कूलमा आँखा शिविर आयोजना गरेको थियो ।

हिमालयन आँखा अस्पतालको प्राविधिक सहयोगमा भएको शिविरबाट १३ वर्षका बालकदेखि ८८ वर्षका वृद्धवृद्धाले पनि सेवा लिए ।

शिविरमा आँखा अस्पतालका नेत्र सहायक मिलन क्षेत्री, दीपा शाही, आस्तिका चौधरी, अशिम शाही र विशाल घर्तीले बिरामीका आँखा जाँच गरेका थिए ।

शिविरमा आएका आँखाका बिरामीलाई औषधि र चश्मा निःशुल्करुपमा वितरण गरिएको थियो ।

संस्थाका अध्यक्ष कृष्णकुमार श्रेष्ठको अध्यक्षतामा कार्यक्रम भएको थियो ।

अन्तरमनहरुको आनन्दका लागि परोपकार गरौं भन्ने मूल नाराका साथ २०७५ सालमा संस्था स्थापना भएको हो ।

संस्थामा हाल ९० जना आवद्ध छन् । संस्थाले आर्थिक अभावमा दाहसंस्कार गर्न कठिन हुनेहरुका लागि दाहसंस्कार खर्च व्यवस्थापन, गरिब तथा जेहेन्दार विद्यार्थीलाई छात्रवृत्ति प्रदान गर्दै आएको छ ।

यसैगरी अध्ययन गर्नबाट बञ्चित भएका र विद्यालय पढाइबाट छुटेका श्रमिकका बालबालिकालाई अध्ययनमा जोड्ने, मानव सेवा आश्रमसँगको सहकार्यमा घरबार विहीनहरुको व्यवस्थापन र बाढी पीडितहरुलाई सहयोग गर्दै आएको संस्थाका अध्यक्ष डा. श्रेष्ठले जानकारी दिए ।