पोखरा । नेकपा एमाले कास्कीको १० औँ अधिवेशनको तयारी पूरा भएको छ । नेकपा एमाले, जिल्ला कमिटि कास्कीले पोखरामा पत्रकार सम्मेलनको आयोजना गरी पुस २३ गते हुने अधिवेशनको तयारी पूरा भएको जानकारी दिएको हो ।

अधिवेशनमा लागि ९१४ जना प्रतिनिधि छनोट भैसकेको एमाले कास्कीका कार्यवाहक अध्यक्ष मनबहादर गुरुङले जानकारी दिए ।

कास्कीका एक महानगरपालिका र चार गाउँपालिका मातहतका ७२ वटा वडा, विशेष इलाका मातहतका शाखा कमिटी, गाउँपालिका, महानगरपालिका, जनवर्गीय संगठनबाट छानिएका प्रतिनिधि, सल्लाहकार परिषद्, जिल्ला कमिटी पदाधिकारी तथा सदस्यहरु अधिवेशनमा प्रतिनिधिका रुपमा छनोट भएका छन् ।

अधिवेशन सम्पन्न गर्नका लागि विभिन्न १० वटा उपसमितिहरु गठन भएका छन् । देशभरका ७७ वटै जिल्ला अधिवेशनको उद्घाटन एमाले अध्यक्ष एवं पूर्व प्रधानमन्त्री केपी शर्मा ओलीले भर्चुअल माध्यमबाट गर्ने प्रचार विभाग प्रमुख तेजनारायण अधिकारीले जानकारी दिए ।

अधिवेशनले नयाँ नेतृत्व समेत चयन गर्ने छ । झण्डै आठ वर्षपछि जिल्ला अधिवेशन हुन लागेको हो । अधिवेशनबाट सकेसम्म सर्वसम्मत नसके आन्तरिक प्रतिस्पर्धाबाट नेतृत्व चयन गरिने एमाले कास्कीका कावा अध्यक्ष गुरुङले बताए ।

सम्बन्धित समाचारः

एमाले कास्कीको १० औं अधिवेशन पुस २३ गते, प्रतिनिधि छानिए, प्रचारप्रसार तीव्र