पोखरा महानगरपालिकाको मेयरमा नेपाली कांग्रेसका नेता बिमल बहादुर कार्कीले स्वतन्त्र उम्मेदवारी दिएका छन् । पोखरामा नेकपा एकीकृत समाजवादीलाई मेयर दिने सहमति गठबन्धनका केन्द्रीय नेताबीच भएको थियो । तर, कार्कीले केन्द्रीय निर्णयविपरीत दिएको उम्मेदवारी फिर्ता लिएनन् ।

शुक्रबार उम्मेदवारी फिर्ता लिने समयसम्म मेयरमा बागी उम्मेदवारी दिएका कांग्रेसकै दुई नेता ऋषि सापकोटा र नन्दप्रसाद तिवारीले उम्मेदवारी झिके । तर, कार्कीले पार्टीको निर्देशन अवज्ञा गर्दै उम्मेदवारी यथावत राखेका छन् ।

उम्मेदवारी नझिकेसँगै उनी पार्टीको साधारण सदस्यसमेत नरहने गरी स्वतः पार्टीबाट निष्कासन भएका छन् । उनी २०५५ सालमा तरुण दलमा लागेर कांग्रेससँग जोडिएका थिए । अहिले पार्टीले कारबाही गर्ने चेतावनी दिँदादिँदै कार्की टसमस भएनन् ।

प्रस्तुत छ, पोखराको मेयरमा स्वतन्त्र उम्मेदवारी दिएका कार्कीसँग गरिएकाे संक्षिप्त कुराकानीः

पार्टीको निर्देशन लत्याएर उम्मेदवारी दिनुभयो । किन ?

म पार्टीको इमान्दार कार्यकर्ता हुँ । तर, पार्टीले गलत निर्णय गर्दा म समर्थन् गर्न सक्दिनँ । नेतृत्वले गलत गर्छ भने कार्यकर्ताले त्यसको प्रतिवाद गर्नुपर्छ भनेर वीपी कोइरालाले भन्नुभएको छ । त्यसकारण पोखरा महानगरपालिकामा कांग्रेसको उम्मेदवार नहुँदा र कांग्रेसीले कहाँ भोट हाल्ने भइरहँदा बागी उम्मेदवारी दिएको हुँ ।

पार्टीले स्वतः निष्कासन भनेको छ । भनेपछि अब स्वतन्त्र रहने हो ?

पार्टीले कारबाही गर्छ भने के पो लाग्छ र ! स्वतन्त्रै भइन्छ ।

पार्टीले निष्कासन गर्ने निर्णय गरेको सुन्दा डर लागेन ?

विज्ञप्ति निकालिएको छ भन्ने सुनेँ । नेतृत्वले पहिलाको चुनावमा गोरखामा आँखा चिह्नमा, मकवानपुरमा गाईमा, चितवनमा हँसियाहतौडामा भोट हाल्न भन्यो । अहिले फेरि पोखरामा कलम चिह्नमा भोट हाल्न भनेपछि कार्यकर्ता कहाँ मान्छन् ? नेतृत्वले गलत निर्णय गर्छ भने कार्यकर्ता मान्नुपर्छ भन्ने छैन । नेतृत्वको मलद्वारलाई हरिद्वार मान्न सकिँदैन । गलत निर्णयलाई गलत भनिन्छ । पार्टीले गलत निर्णय गर्दा मैले सच्चा निर्णय गरेको छु । त्यसैले पार्टीसँग मलाई डर छैन ।

तपाईंकै दुई जना कांग्रेसका सहयात्री उम्मेदवारी झिकेर पछि हट्नुभयो । तपाईंलाई केन्द्रीय नेताबाट दबाब आएन ?

मेरो साथीहरूसँग बसेर मलाई समर्थन गर्नुस्, म उम्मेदवार हुन्छु तपाइँहरू छोड्नुस् भनेर साथीहरूलाई छुटाएको हो । नगर सभापति लडेको मान्छे, पार्टीका विभिन्न तहमा बसेर काम गरेको मान्छे स्वतन्त्र लड्दा छोड्नुस् भनेर दबाब आउनु स्वाभाविक हो ।

उम्मेदवारी फिर्ता लिनुभएन । ३० वैशाख केन्द्रित तयारी कसरी गर्दै हुनुहुन्छ ?

मैले २० दिन पहिल्यै उम्मेदवारी दिँदै छु भनेर साथीहरूलाई भनिसकेको थिएँ । सबै साथीहरू मेरो उम्मेदवारीले खुसी हुनुहुन्छ । कांग्रेसका साथीले आफ्नो उम्मेदवारलाई भोट हाल्न नपाएपछि म स्वतन्त्र भएकाले मलाई भोट आउँछ । कांग्रेस मात्रै होइन परिवार दल, वैदिक सनातन हिन्दु धर्ममा आबद्धले सहयोग गर्नुभएको छ ।

स्वतन्त्र उठेर चुनाव जित्नुहुन्छ ?

चुनाव जित्छु भनेरै उम्मेदवारी दिएको हुँ । पोखरेली जनता सबैले मलाई भोट हाल्नुहुन्छ ।

घोषणापत्रको तयारी के छ ? के कुरालाई प्राथमिकता दिनुभएको छ ?

घोषणापत्रको तयारीमा जुटेको छु । अहिलेजस्तो स्मार्ट सिटी, रेल बनाउँछु भन्ने कुरा मेरो घोषणापत्रमा हुँदैन । पोखराको पर्यटनलाई कसरी विकास गर्ने भन्ने योजनामा जोड दिन्छु । कति ठाउँमा खानेपानीको समस्या छ, स्वास्थ्य, शिक्षाको समस्या छ । पोखराका चोकमा ट्राफिकको समस्या छ, यसलाई व्यवस्थित गर्ने योजना ल्याउँछु । चुनाव जितेँ भनेँ महानगरमा भएको भ्रष्टचारको फोहोर सफाइ गर्छु ।