पोखरा महानगरपालिकाका नवनिर्वाचित मेयर धनराज आचार्यले बिहीबार दिउँसो पदभार ग्रहण गर्दैछन् । त्यसअघि, पूर्वान्ह १० बजे मुख्य निर्वाचन अधिकृतकाे कार्यालयले नवनिर्वाचित पदाधिकारीहरूको घोषणा सभा, प्रमाणपत्र वितरण तथा शपथ ग्रहण पोखरा सभागृह हलमा गराउँदैछ ।

नवनिर्वाचित मेयर आचार्यले पदभार ग्रहण गर्दा चार वटा निर्णय गर्ने खुलाएका छन् । गठबन्धनले बुधबार आयोजना गरेको कार्यक्रममा बोल्दै उनले आफूले गर्ने पहिलो निर्णयको जानकारी गराएका हुन् ।

उनले पोखराको जिरो किलोमिटरदेखि हल्लनचोकसम्मको डेढ किलोमिटर डिभाइडरमा फूल रोपेर आफ्नो कार्यकाल सुरु गर्दैछन् । ‘हामी मेयरसहित वडाध्यक्ष र निर्वाचित जनप्रतिनिधिले कम्तिमा एउटा फूल रोप्ने छौं । त्यसपछि पदभार ग्रहण गर्ने छौं,’ उनले भने, ‘भोलि दिउँसो दुई बजेपछि हामी मत दिने–नदिने सबैका हौं ।’

मंगलबार निर्वाचित भएपछि धनराजले केही सरप्राइज दिने पनि बताएका थिए । उनले बुधबार पहिलो चार निर्णय खुलाएका छन् । उनले भनेको सरप्राइज निर्णय तेस्रो नम्बरमा हुनेछ । किनकि उनले मंगलबार पत्रकारसँगको कुराकानीमा तेस्रो निर्णयबारे खुलाएनन् । तर, बुधबारको कार्यक्रममा उनले आफूले गर्ने चारवटै निर्णय सार्वजनिक गरेका छन् ।

उनले गर्न लागेका निर्णयः

१ जन्म, विवाह मृत्यु दर्ता ६ महिनाभित्र गर्दा पनि निःशुल्क । हाल ३५ दिनको समय रहन्छ ।

२ पोखरालाई पर्यटकीय राजधानी घोषणा गर्न माग गरेर संघ सरकारलाई लेखी पठाउने ।

३ पोखरा चिनाउने कुनै योजना अर्थात् ‘सिम्बोल अफ पोखरा’ बनाउन आह्वान गर्ने । उत्कृष्टलाई २ लाख रुपैयाँ पुरस्कार । यसका लागि एक महिनाको समय हुनेछ ।

४ ट्राफिक व्यवस्थापनका लागि प्रस्ताव मागेको र त्यसलाई अगाडि बढाउने ।