तनहुँ । पृथ्वी राजमार्ग अन्तर्गत तनहुँको आँबुखैरेनी गाउँपालिका–४ साँखरमा सडक भाँसिएकाे ठाउँबाट कार खस्दा १ जनाकाे मृत्यु भएकाे छ ।

शुक्रबार बिहान ३ बजे उक्त कार दुर्घटनामा परेको हाे । उक्त स्थानमा त्यसअघि नै सडक भासिएको थियाे । लामाे समयकाे जामपछि रातकाे समयमा तीव्र गतिमा गुडाएका कार चालकले बाटाेकाे अवस्था थाहा नपाउँदा भासिएकाे ठाउँबाट एक्कासी खस्न पुगेकाे अनुमान गरिएकाे छ ।

कारका कति जना सवार थिए थाहा नभएको र घटनास्थलमा एक शव भेटिएको प्रहरीले जनाएकाे छ । कार पहिरोले पुरिएको छ । मृत्यु भएकाको परिचय खुल्न सकेको छैन । मर्स्याङ्दी नदीको खोंचमा कार खसेको देखिएपछि उद्धारको लागि गोताखोर, उद्धारकर्ता र स्वास्थ्यकर्मीसहितको टोली परिचालन गरिएको प्रहरीले जनाएको छ ।

मर्स्याङ्दी जलविद्यतु आयोजना नजिक सडक भासिएको आँबुखैरेनी गाउँपालिका वडा नम्बर ३ का सदस्य मनोजकुमार श्रेष्ठले बताए । बिहीबार रातिदेखि परेको अविरल वर्षाका कारण सडक भासिएको हो । सडक भासिएकाले बेलिब्रिज नराखेसम्म सवारी आवतजावत सम्भव नभएको तनहुँका प्रहरी नायब उपरीक्षक युवराज खड्काले जानकारी दिए ।

खड्काका अनुसार करिब २० मिटर सडक भासिएको छ । तत्काल मर्मत गर्ने अवस्था पनि नभएकाले जताबाट आएको त्यतैतर्फ सवारी साधन फर्काइएको प्रहरीले बताएको छ ।