काठमाडौं । देशभर प्रदर्शन भइरहेको चलचित्र ‘कबड्डी ४ः द फाइनल म्याच’को प्रदर्शन रोक्न माग गर्दै उजुरी परेको छ। जिल्ला प्रशासन कार्यालय काठमाडौंमा उजुरी दर्ता गर्दै फिल्मको प्रदर्शन रोक्न माग गरिएको छ।

उक्त चलचित्रमा बौद्ध धर्मको मानमर्दन हुने दृश्य र कथा समावेश गरिएको भन्दै रोविन कुमार लामाले प्रदर्शन रोक्न माग गरी उजुरी दर्ता गराएका हुन् ।

उनले फिल्मको दृश्य र शब्दलाई काँटछाँट गरेर मात्रै प्रदर्शन गर्नुपर्ने बताएका छन्।

सोमबार लामाले चलचित्र जाँच समिति, सञ्चार तथा सूचना प्रविधि मन्त्रालयसहितलाई विपक्षी बनाएर उजुरी दर्ता गराएका छन् । सोमबार १२३१ नम्बरमा उनको उजुरी दर्ता भएको छ ।

‘हाल प्रदर्शन भइरहेको उक्त कबड्डी –४ चलचित्रको मूल कथावस्तु र प्रस्तुतिका दृश्यहरू बौद्ध धर्मावलम्बी लामा (भिक्षु) वर्ग, सनातन बौद्ध सम्प्रदाय विशेषको मान मर्यादामा गम्भीर हानि नोक्सानी पु¥याइ अपहेलित गर्ने साथै सामाजिक सुसम्बन्धमा विरोध पर्ने प्रकृतिको रही सार्वजनिक हित सदाचार वा नैतिकताको प्रतिकूल असर पर्ने विषय समावेश हुँदा हुँदै चलचित्र (निर्माण, प्रदर्शन तथा वितरण) ऐन, २०२६ को दफा ८ को उपदफा (३) को कानुनी व्यवस्थाविपरीत प्रत्यर्थी चलचित्र जाँच समितिबाट उक्त चलचित्रलाई प्रदर्शन अनुमति दिने कार्य कानुनविवरीत भएकोले सोउपर चित्त नबुझी नेपाल सरकारसमक्ष यो पुनरावेदन पत्र चढाएको छु,’ लामाले दिएको उजुरीमा भनिएको छ।

रामबाबु गुरुङको निर्देशनमा बनेको फिल्म ‘कबड्डी ४’ जेठ १३ गतेबाट प्रदर्शनरत छ। फिल्मले हालसम्म देशभरको प्रदर्शनबाट २० करोडभन्दा बढि आम्दानी गरिसकेको छ। दयाहाङ राई, सौगात मल्ल, बुद्धि तामाङ, विजय बराल, मिरुना मगरलगायतका कलाकारले फिल्ममा अभिनय गरेका छन्।