आशिष पुरी, पोखरा । संयुक्त अरब इमिरेट्स (युएई) का राजपरिवार सदस्य ‘मेम्बर अफ रुलिङ फेमेली अफ युएई’ शेख मोहम्मद माक्तुम जुमा ला माक्तुम भोलि पोखरा आउँदैछन् ।

राजपरिवारको दुबई स्थित एमबीएम नामक व्यापारिक संस्थान (राजपरिवार कार्यालय र लगानी होल्डिंग कम्पनी) को प्रमुख समेत रहेको मक्तुम पोखरा भ्रमणको सन्दर्भमा सोमबार आउने भएका हुन् ।

उनी सवार जहाज भोलि मध्यान्ह १२ बजे पोखरा एयरपोर्ट ल्याण्ड हुने कार्यक्रम छ । एयरपोर्टमा स्वागत कार्यक्रम समेत रहेको पोखरा भ्रमणका संयोजक एवं उर्जा ल्याबका संचालक विनायक पौडेलले जानकारी दिए ।

राजकुमार मक्तुमले पोखरा भ्रमणका क्रममा बन्जी जम्प, प्याराग्लाइडिङ लगायतका साहसिक खेल खेल्न सक्ने सम्भावना रहेको पौडेल बताउँछन् ।

मक्तुम पूर्वाञ्चल क्यान्सर अस्पतालमा राखिएको पेटको सीटी–स्क्यान उपकरण शुभारम्भ गर्न झापा पुगेका थिए। व्यवसायी एवं नेकपा एमालेका नेता दुर्गा प्रसाईंको निमन्त्रणमा उनी नेपाल आएका हुन् ।

भीआइपीको भएपनि उनी शनिवार काठमाडौंबाट झापा श्री एयरलाइन्सको नियमित उडानबाट नै पुगेका थिए। शेख झापाको मेची क्राउन होटेलमा बसेका छन् ।