पोखरा । अनलाइन मिडिया ‘नेपालअहिले डटकम’ पोखराबाट शुरु भएको छ । काठमाण्डौंको अनामनगरमा मूख्य र पोखराको शिवालयचोकमा प्रदेश कार्यालय रहेको नेपालअहिले अनलाइनको पोखरा महानगरपालिकाका मेयर धनराज आचार्य र वरिष्ठ पत्रकार नारायण कार्कीले पोखरास्थित कार्यालय परिसरमा आयोजित कार्यक्रममा शुभारम्भ गरे ।

कार्यक्रममा प्रमुख अतिथि मेयर आचार्यले नेपालअहिलेले पत्रकारिताको धर्म निर्वाह गर्दै जनतालाई सुसूचित गर्न महत्वपूर्ण भूमिका निर्वाह गर्ने अपेक्षा राखेको बताए । उनले मिडियाहरुका बीचमा उत्कृष्ट बन्न सकोस् भन्दै अनलाइनको सफलताको कामना गरे ।

कार्यक्रमका विशेष अतिथि वरिष्ठ पत्रकार कार्कीले नेपालअहिलेलाई जनताको आवाज बनेर अगाडि बढ्नका लागि शुभकामना दिए । उनले अनलाइन मिडियाले समाचार प्रकाशन प्रशारणका क्रममा छिटो र पहिलो बन्ने दौडमा लाग्नुभन्दा सही सूचना सम्प्रेषणमा बढी जोड दिनुपर्ने सुझाव राखे ।

नेपालअहिलेका अध्यक्ष तथा सम्पादक गणेश बराल ‘ढाकामोहन’ ले अहिले नेपालअहिले र अंग्रेजीमा नेपाल लेटेस्ट सञ्चालनमा ल्याएकाे जानकारी दिँदै निकट भविष्यमै प्रदेश केन्द्रित वेबसाइट सञ्चालन गरिने बताए । अनलाइन पत्रकार संघ गण्डकीका संस्थापक अध्यक्षसमेत रहेका बराल लामाे समयदेखि यहाँकाे अग्रणी न्यूजपाेर्टल पाेखरा न्यूज डटकमका संस्थापक सम्पादक थिए ।

कार्यक्रममा पोखरास्थित विभिन्न संचारमाध्यममा कार्यरत पत्रकार र नागरिक समाजका प्रतिनिधिहरुको उपस्थिति रहेको थियो ।  सोही कार्यक्रममा नेपाली भाषाको अनलाइन नेपालअहिलेडटकमसँगै अंग्रेजी भाषामा नेपाललेटेष्टडटकमको पनि औपचारिक रुपमा शुभारम्भ गरिएको छ ।