पाेखरा । माइक बिग्रिएपछि गण्डकी प्रदेश सभाको बैठक आधा घन्टाको लागि स्थगित भयाे। आइतबार बिहान ११ बजेदेखि सुरु भएको बैठकमा बजेटमाथि छलफल चलिरहेको थियो ।

जनता समाजवादी पार्टी (जसपा) सचेतक धनमाया लामा पोखरेल बोलिरहेका बेला माइक बिग्रियो । सभामुख अधिकारीले समस्या समाधान गर्न कर्मचारीलाई भने । फेरि आफ्ना धारणा राख्न सभामुखले सांसद लामालाई समय दिए । उनले बिना माइक बाेलिन् । माइकमा प्राविधिक समस्या आएको बताउँदै सभामुख नेत्रनाथ अधिकारीले ३० मिनेटका लागि स्थगित भएको जानकारी गराए ।

गण्डकी प्रदेशसभामा गत २० असारदेखि आगामी आर्थिक वर्ष २०७९/८० को बजेटमाथिको छलफल जारी छ । बजेटमा सांसदले मुख्यमन्त्री र मन्त्रीले बाबु आमाको नाममा ट्रस्ट खोल्दै करोडौं रकम राख्दा जनताले ५ लाखको खानेपानी, सडक, विद्युत्‌का योजना नपाएको बताएका थिए ।

जनताको ढाड सेक्ने गरि कर बढाउने, जनतामुखी बजेट ल्याउन नमानेर आफ्नो मनपरी तरिकाले बजेट ल्याइएको एमालेका प्रमुख सचेतक मायानाथ अधिकारीले बताए । उनका अनुसार संघीयता नै धरापमा पार्नेगरी सरकारले बजेट ल्याएको छ । उनले पछि थप गरिएका २८ करोडका योजनाको लागि बजेट कसरी व्यवस्थापन गर्ने भन्ने विषयमा पनि प्रश्न गरेका थिए ।