पोखरा । राष्ट्रिय प्रजातन्त्र पार्टीको तर्फबाट कास्की क्षेत्र नम्बर २ २ मा उम्मेदवारी दिएका अरुण गिरीले पोखराको पुरानो नेवार वस्तीलाई सम्पदा क्षेत्रको घोषणा गर्नुपर्ने बताएका छन् । पुरानो नेवार वस्तीको मौलिकतालाई जोगाउँदै सो क्षेत्रलाई सम्पदा क्षेत्र घोषणा गरि त्यहाँको आर्थिक विकास गनुपर्ने उनले बताए ।

शनिबार पोखरा ४ मा पर्ने गणेशटोल, पालिखेचोक, गैह्रापाटन, चिप्लेढुंगा लगाएतका क्षेत्रमा घरदैलो गरेका अरुण गिरीले नेवार समुदायको ऐतिहासिक विरासत बोेकेको ठाऊँलाई नीतिगत रुपमा सम्बोधन गरि त्यसको लागि विशेष प्याकेज निर्माण गर्नुपर्ने बताए । गिरीले आफूसँग नेवार वस्ती रहेको सो क्षेत्रको आर्थिक गतिविधि बढाउनका लागि विशेष योजना रहेको बताउँदै निर्वाचित भएपछि सो क्षेत्रको वृहत्तर आर्थिक विकासका लागि काम गर्ने प्रतिबद्धता जनाएका छन् ।

पुरानो नेवार वस्तीका मौलिक संरचनालाई जोगाईराख्नका लागि राज्यले नीतिगत रुपमा सम्बोधन गर्नुपर्ने उनले बताए । साथै सो क्षेत्रको आर्थिक विकासका लागि नेवार समुदायसँग जोडिएको साँस्कृतिक, कला र खानपिनको सँस्कारलाई व्यवसायिकतासँग जोड्न आवश्यक रहेको गिरीको भनाई छ । उनले नेवार समुदाय कला र सँस्कृतिको धनी रहेको उल्लेख गर्दै पर्यटकीय हिसाबले प्रचार गर्न सके सो क्षेत्रको आर्थिक उन्नती हुने कुरा दोहोर्याए ।

आफूले घोषणापत्रमा समेत प्राथमिकता दिएर नेवार वस्तीको कुरालाई उल्लेख गरेको गिरीले बताए । आफ्नो एजेन्डाअनुरुप काम गर्न सके पुरानो नेवार वस्तीलाई साँस्कृतिक हब को रुपमा विकास गर्न सकिने उनको तर्क छ । ‘नेवार समुदायको बाजागाजा, नृत्य र कलालाई प्रदर्शन गर्ने प्लेटफर्मसहित सो सम्पदा क्षेत्रको विकास गर्न जरुरी छ ।’ गिरीले भने -‘त्यही ठाऊँमा बसेर नेवारी खानाका पारखीहरुले विभिन्न परिकारको मज्जा पनि लिन सक्छन् ।’ गिरीले सबै हिसाबले सम्पदा क्षेत्रको मौलिकता जोगाउँदै अध्ययन अनुसन्धानको केन्द्रको रुपमा सो क्षेत्रका विकास हुनुपर्ने बताए ।

घरदैलोको क्रममा गिरीको एजेन्डासँग नेवार समुदायका अधिकांश मतदाताहरुले सहमती जनाएका थिए । आफ्नो ठाऊँको मौलिक विकासको योजनासहित मत माग्न आएका गिरीलाई यो पटक चुनावमा मत दिएर जिताउने उनीहरुले वचन दिएका थिए । अहिलेसम्म उम्मेदवारहरु मत माग्न आउँदा मात्रै काम गर्छु भन्ने गरेको तर निर्वाचित भैसकेपछि एजेन्डालाई बिर्सदै आएको बताउँदै उनीहरुले गिरीलाई त्यसो नगर्न सुझाव दिएका थिए ।