थाइल्याण्डमा हुने प्रतियोगितामा भाग लिन जान लागेका बूढानिलकण्ठ निवासी ३ जना खेलाडीलाई नगर प्रमुख मिठाराम अधिकारी र उपप्रमुख अनिता लामासहितको टाेलीले शुभकामनाका साथ बिदाइ गरेका छन् ।

थाइल्याण्डको हुवाहिन सहरमा माघ १९ गतेदेखि २३ गतेसम्म सञ्चालन हुने मई थाई फेस्टिवलको विश्व च्याम्पियनसिप फाईटमा भाग लिन वडा नं ५ का १३ वर्षिय गेन्जी राई, वडा नं ६ का १८ वर्षिय दिगविजय राठौर र १९ वर्षिय लाल बहादुर तामाङ जान लागेका हुन् ।

डब्लु. वि.सि. मई थाई नेपाल अन्तरगतका ३ खेलाडीहरुलाई संस्थाले नगर प्रमुख, उपप्रमुखसहित संस्थाका अध्यक्ष राजु राई, महासचिव दिपक तामाङ र अन्य मई थाई खेलाडीहरुको उपस्थितिमा पत्रकार भेटघाटसहित बिदाई कार्यक्रम आयोजना गरेको हाे ।

कार्यक्रममा नगरप्रमुख मिठाराम अधिकारीले खेलाडीहरुलाई मई थाई खेलमार्फत देशकै प्रतिनिधित्व गर्न लागेकोमा धन्यवाद व्यक्त गर्दै जीतको अग्रिम शुभकामना व्यक्त गरे ।

स्थापनाकाल देखिनै नगरपालिकाको साथ र सहयोग पाईरहेको डब्लु. वि.सि. मई थाई नेपाललाई यस खेलको विकास र खेलाडीको स्तरोन्नतिको लागि नगर परिषद्मा थप छलफल भईरहेको उनले जानकारी दिए । थाईल्याण्डमा हुन गईरहेको उक्त प्रतियोगितामा विश्वभरका ५० वटा देशहरुले सहभागिता जनाउने छन् ।

प्रतियोगितामा खेलाडिहरुको व्यवस्थापनका लागी टिम म्यानेजरका रुपमा संस्थाका अध्यक्ष एवं प्रशिक्षक राजु राई र प्रशिक्षक पुरण रोकाया खेलाडीहरुसँगै थाईल्याण्ड जाने सचिव दिपक तामाङले जानकारी दिए ।