पोखरा । तीनै तहको अदालतबाट दोषी ठहर भई जन्मकैद भुक्तान गरिरहेका रेशम चौधरीलाई आममाफी दिनु संवैधानिक सर्वाेच्चता र विधिको शासनविपरीत भएको अनेरास्ववियुले ठहर गरेको छ । प्रचण्ड सरकारको सिफारिसमा आइतबार राष्ट्रपति रामचन्द्र पौडेलबाट आममाफी पाएका चौधरी सोमबार कारागारमुक्त भएका छन् ।

तर, टीकापुर घटनासँग सम्बन्धित सर्वाेच्च अदालतबाट भएको फैसलाको पूर्णपाठ नआउँदै सरकारको सिफारिसमा आममाफी दिइनु दण्डहीनतालाई प्रश्रय दिने कार्य भएको अनेरास्ववियुले बताएको हो ।

संघीय लोकतान्त्रिक गणतन्त्रलाई लोकतन्त्रको अभ्यास गर्ने उत्कृष्ट व्यवस्थाका रुपमा स्थापित गर्नुपर्नेमा झनै उल्टो भएको भन्दै अनेरास्ववियु कास्की सडकमा उत्रेको छ । अनेरास्ववियु कास्कीले पोखराको नर्सिङ क्याम्पस अगाडि विरोध सभा आयोजना गरेको छ ।

अनेरास्ववियका केन्द्रिय सचिव आशिर्वाद सुवेदीले जनताको ठूलो बलिदानबाट प्राप्त उपलब्धिलाई आज धुमिल बनाउने प्रयत्न भइरहेको उल्लेख गर्दै यसो हुन नदिने बताए ।

उनले भने– ‘गणतन्त्र दिवस यसअघिका वर्षहरुमा निकै उल्लासपूर्ण ढंगले मनाउँदै आएका थियौ । २४० वर्ष कायम रहेको निरंकुश राजतन्त्र अन्त्य भई जनताको शासन व्यवस्था स्थापित भएको गौरवपूर्ण दिनका रुपमा मनाउने गरेका थियौँ । हामी आज पनि त्यही उचाईंमा मनाउन चाहेका छौँ ।’

यस्तै, अर्का केन्द्रिय सचिव आरती भट्टराईले न्यायालयको तीनै तहले दोषी ठहर गरेकालाई आममाफी दिएर गणतन्त्रको धज्जी उडाएको बताइन् ।

‘न्यायलयको तीन तहभन्दा माथि गएर राष्ट्रपतिबाट आममाफी भयो अनि सडकमा उत्रिन बाध्य भयौँ । गठबन्धनको बलले हत्याराहरुलाई दिनदहाडै आममाफी दिने जुन कार्य भयो त्यसको हामी खण्डन गर्छौ ।’ उनले भनिन् – ‘प्रधानमन्त्रीलाई प्रश्न गर्न चाहन्छु । पटक पटक उहाँले १७ हजार मारेर ल्याएको गणतन्त्र भन्नुहुन्छ, के एक जना हत्यारालाई माफी दिन ल्याउनुभएको थियो ? जसरी गणतन्त्र आउँदा हरेक नेपाली सडकमा उत्रिएका थिए । गणतन्त्रमा यस्ता क्रियाकलाप भए त्यसरी नै जनता सडकमा उत्रनेछन् ।’

अनेरास्ववियु कास्कीका अध्यक्ष सन्तोष पोखरेलको अध्यक्षतामा भएको कार्यक्रममा केन्द्रिय लेखा आयोग अध्यक्ष सुनिल तिमिल्सिना लगायतले बोलेका थिए । कार्यक्रममा सहभागीहरुले प्लेकार्ड पनि प्रदर्शन गरेका थिए ।