काठमाण्डौ। प्रतिनिधि सभा सदस्य तथा काँग्रेस सांसद दीपक गिरीले सरकारको चर्को आलोचना गरेका छन्। आइतबार प्रतिनिधि सभा बैठकमा बोल्दै गिरीले सरकारको आलोचना गरेका हुन्।

उनले प्रधानमन्त्री प्रचण्ड, सभापति शेर बहादुर देउवा र अर्थमन्त्रीको क्षेत्रमा मात्रै धेरै बजेट पारिएको भन्दै असन्तुष्टि पोखे । गिरीले आफू सत्तापक्षीय सांसद भए पनि यस्ता कार्यको विरोध गर्ने बताउँदै मन्त्रीहरुले आफ्नो क्षेत्रमा मात्र बजेट पठाउँदा समस्या भएको बताए ।

गिरीले आफूलाई जनताले बारम्बार फोन मार्फत समस्या सुनाउने गरेपनि आफूले केही गर्न नसकेको दुखेसो पोखे। जनताले साना-ठूला समस्याका लागि सांसदहरुलाई सम्झिने गरेपनि अधिकार कटौती हुँदै गएकोप्रति उनले असन्तुष्टि पोखे ।

काठमाडौं महानगरका मेयर बालेन शाहको प्रशंसा गर्दै उनले अगाडी भने – ‘म त सलाम गर्छु बालेनजीलाई, उहाँले हामी झोलेलाई वडाध्यक्षको स्तरमा पुर्‍याइदिनुभयो।’

साथै गिरीले भारतको तत्कालिन कम्पनी सरकारको सिको गर्दै नेपालमा पनि दिउँसो ४ बजे बजेट घोषणा गरिएको भन्दै आगामी आर्थिक वर्षदेखि बिहान १० बजे घोषणा गर्नुपर्ने धारणा राखे।