तमु (गुरुङ) समुदायले मनाउने माैलिक तथा सांस्कृतिक पर्व ट्होंटे पोखरामा मंगलबार धुमधामका साथ मनाइएको छ।

हरेक वर्ष साउन र चैतको अन्तिम मंगलबार मनाउने यो पर्वलाई मंगलबार पोखरामा तमु धिं नेपालले विविध कार्यक्रमको आयोजना गरी मनायो ।

ट्होटेंको अवसरमा तमु धिँ नेपालले आज पोखरा फूलबारीबाट ट्हाेंटे र्‍यालीसहित महेन्द्रपुल, नयाँबजार हुँदै तमु धिँ नेपालको कार्यालयमा पुगेर ट्होटें मूल समारोहमा परिणत भएको थियो ।

र्‍यालीमा सहभागीले गुरुङका संस्कार, संस्कृति जनाउँदै भेषभूषामा सजिएर विभिन्न नृत्य र भूत भगाउने अभिनय प्रदर्शन गरेका थिए । र्‍यालीमा तमुसहित अन्य जातीय समाजका प्रतिनिधिसमेत सहभागी भएको अध्यक्ष गुरुङले जानकारी दिए।

ट्होंटे पर्व बर्षमा उभाैँली र उधाैली गरी दुई पटक मनाउने प्रचलन छ। गुरुङहरुको संस्कृतिकाे निरन्तरता र युगाैँसम्म पहिचान स्थापित गर्न यो पर्व महत्वपूर्ण रहेकाे तमु धिं नेपालका अध्यक्ष हुमबहादुर गुरुङ बताउँछन् ।

परापूर्वकालमा तमु राज्यमा बसोबास गर्नेहरुले राज्यभित्र देखिएका बैरी वा शत्रुहरुलाई राज्यको सीमा कटाउदै ट्हो (क्षेत्र) को संरक्षण गरेको परम्परागत इतिहास भएको मानिन्छ ।