काठमाडौँ। मुटु रोग उपचारका क्षेत्रमा अब्बल प्रा.डा. भगवान कोइरालाले उमेर हदका कारण त्रिभुवन विश्वविद्यालय चिकित्सा शास्त्र अध्ययन संस्थान (आईओएम) बाट अवकाश पाए लगत्तै चिकित्सा विज्ञान राष्ट्रिय प्रतिष्ठान (न्याम्स)मा आबद्ध भएका छन् ।

डा.कोइराला न्याम्समा भिजिटिङ प्रोफेसरको रुपमा एकेडेमिक (शैक्षिक) कार्यक्रममा सहभागी हुँदै छन् । उनले अब वीर अस्पतालमा मुटु उपचार सेवामा योगदान गर्ने भएका छन्।

उनी गतसाता देखि न्याम्समा आबद्ध भै वीर अस्पतालका एक बिरामीको जटिल शल्यक्रिया समेत गरिसकेका छन् । उनले आफू वीर अस्पतालमा मुटुका बिरामीको उपचारका लागि काम गर्ने बताए ।

मुटुका बिरामीका लागि नाम जस्तै काम गरेर भगवान बनेका डा.कोइराला गंगालाल अस्पतालका कार्यकारी निर्देशक हुँदै पछिल्लो समय मनमोहन कार्डियोथोरासिक भास्कुलर तथा ट्रान्प्लान्ट सेन्टरमा कार्यकारी निर्देशक पदमा कार्यरत थिए । २८ बर्ष मुटुसँग सम्बन्धित स्वास्थ्य सेवा प्रदान गर्दै आएका डा. कोइराला यसैसाथ उमेर हदका कारण सेन्टरबाट गत साउन ९ गते अवकाश पाएका हुन् ।

हाल सम्म गंगालाल, त्रि.वि.शिक्षण अस्पताल, मनमोहन कार्डियोथोरासीसबाट मुटु उपचारका क्षेत्रमा निकै महत्त्वपूर्ण योगदान गरेका डा.कोइरालाले अबका दिनमा वीर अस्पतालबाट विशेषज्ञ सेवा प्रदान गर्ने जानकारी गराए । वीर अस्पतालमा मुटुको उपचारका साथै शैक्षिक कार्यक्रममा पनि सहभागी हुने उनको कार्यक्रम रहेको जानकारी गराए ।

उनले वीरमा दुई दिन ओपिडी र दुई दिन शल्यक्रिया गर्ने योजना अघि सरेको र अन्तिम निर्णय हुन बाँकी रहेको अस्पतालका निर्देशक डा.सन्तोष पौडेलले जानकारी गराए । डा.कोइरालाको वीरको आगमनले वीरको मुटु विभागका साथै पुरै अस्पताल र शैक्षिक कार्यक्रममा समेत सुधार हुने अपेक्षा लिइएको डा.पौडेलले बताए।

डा.कोइराला नेपाल मेडिकल काउन्सिलका अध्यक्ष हुन् । उनी पछिल्लो समय गैर नाफामूलक रुपमा काठमाडौँ इन्स्टिच्युट अफ चाइल्ड हेल्थ (किओच) परियोजना सञ्चालन गर्ने योजनामा सक्रिय रुपमा लागेका छन् ।