काठमाडौं। वैदेशिक रोजगारको लागि टर्की पठाइ दिन्छु भन्दै ठगी गरेको अभियोगमा प्रहरीले पोखराकी एक महिलालाई पक्राउ गरेको छ।

कास्की जिल्ला पोखरा महानगरपालिका-५ लेखनाथ टोल निवासी ३२ वर्षीया सुरूची भुजेललाई प्रहरीले शनिबार पक्राउ गरेको हो ।

प्रहरीका अनुसार सुरूची भुजेल सहित सोही टोलका ४२ वर्षीय विनोद श्रेष्ठ समेतले ३० जनालाई टर्कीमा गएको भूकम्प पश्चात पुन: निर्माणको लागि युएनले सहयोग गर्ने उद्देश्यले कामदार चाहिएको र मासिक १४ सय अमेरिकी डलर तलब हुने भन्दै प्रलोभनमा पारी पीडितहरूबाट १ करोड १५ लाख ९९ हजार ८ सय रुपैयाँ ठगी गरेका थिए।

पीडितहरूको उजूरी पश्चात आवश्यक कारवाहीका लागि वैदेशिक रोजगार विभागबाट जाहेरी दरखास्त प्राप्त भएपछि केन्द्रीय अनुसन्धान व्यूरो महराजंगजबाट खटिएको प्रहरीले सुरूचीलाई पोखराबाट पक्राउ गरेको हो ।

उनी माथि जिल्ला अदालत काठमाडौंबाट ७ दिन म्याद थप अनुमति लिएर ठगी सम्बन्धी कसूरमा आवश्यक अनुसन्धान भइरहेको व्यूरोको भनाइ छ।