पोखरा । पोखरा महानगरपालिका–९ पृथ्वीचोकबाट अवैध लागू औषधसहित ४ जना पक्राउ परेका छन् ।

सोमबार पृथ्वीचोकस्थित सवारी साधन चेकजाँच गर्ने क्रममा पोखराबाट भैरहवा छुट्न लागेको प्रदेश १–०१००१ ख ३४३९ नम्बरको बसमा ड्राईभर बस्ने सिट अगाडी झोलामा लुकाई छिपाई राखेको अवस्थामा लागू औषध फेला पारेको हुँदा उनीहरुलाई प्रक्राउ गरिएको जिल्ला प्रहरी कार्यालय कास्कीले जनाएको छ ।

पक्राउ पर्नेमा चालक गोरखा शहीद लखन गाउँपालिका– ३ स्थायी घर भई हाल कास्की पोखरा महानगरपालिका– १५ रामबहार बस्ने वर्ष ३५ का हिरा बहादुर नेपाली, सह–चालक स्याङ्जा पुतली बजार नगरपालिका– ५ नयाँबजार बस्ने वर्ष ३८ का विशाल कार्की, सह–चालक  स्याङ्जा अर्जुन चौपारी गाउँपालिका– ३ बस्ने वर्ष ४५ का टिकाराम पौडेल, सह–चालक म्याग्दी अन्नपूर्ण गाउँपालिका– १ स्थायी घर भई हाल  कास्की पोखरा महानगरपालिका– ९ पृथ्वीचोक बस्ने वर्ष ३७ का दिपक परियार रहेका छन् ।

उनीहरुले लुकाई छिपाई राखेको एमफेटामाईन (आईस) जस्तो देखिने पदार्थ तत्काल तौल गर्दा ३७.५० ग्राम लागू औषधसमेत बरामद गरेको प्रहरीले जनाएको छ ।

पक्राउ परेका उनीहरुमाथि कास्की जिल्ला अदालतबाट अनुमति लिई लागूऔषध सम्बन्धी मुद्दामा अनुसन्धान प्रकृया अगाडी बढाइएको प्रहरीले जनाएको छ ।