पोखरा । पोखरामा पहिलो पटक मौलिक सस्कृति झल्कने देउसी भैलो महोत्सव हुने भएको छ । पोखरा टेलिभिजनको आयोजनामा हुन लागेको महोत्सवमा विभिन्न जातजाती विशेष तथा समुदाय विशेषको देउसीभैलो प्रर्दशन हुने भएको पोखरामा आयोजना गरिएको पत्रकार सम्मेलनमा जानकारी दिइएको छ ।

“पछिल्लो समय नक्कल गर्ने संस्कृतिका कारण हाम्रा संस्कृति र परम्पराहरुको अस्तित्व नासिने खतरा बढ्दै गएको छ । पछिल्लो समय तिहारको समयमा खेलिने देउसीभैलो विकृतिमुक्त हुन सकेको छैन, यसको मौलिकता हराउँदै गएको आभास हुन थालेको छ । त्यसैले देउसी भैलोलाई ब्यापक बनाउन र मौलिकता जोगाई राख्न उत्सवको रुपमा मनाउने संस्कृतिको विकास गराउने प्रयास गरका हौ ।” पोखरा टेलिभिजनका प्रबन्ध र्निदेशक माधब पनेरुले भने । पत्रकार सम्मेलनमा महोत्सवका मूल्याङ्गकन समितिको संयोजक बरिष्ठ लोकदोहोरी गायक प्रजापती पराजुलीले मौलिकतालाई महोत्सवका रुपमा नल्याउने हो भने हाम्रा परम्परा र संस्कृती बिलिन हुने अवस्था आईसकेको बताए । महोत्सवले मौलिकता जोगाउन एक महत्वपूर्ण कदम चालेको उनको भनाई थियो ।

पोखरा उद्योग बाणिज्य संघको सभाहलमा कार्तिक २५ गते बिहान ११ बजे आयोजना हुने महोत्सवमा दर्शकका लागि निःशुल्क प्रबेशको ब्यवस्था मिलाइएको महोत्सव संयोजक घनश्याम पाण्डेले बताए । महोत्सवले उठान गर्न खोजेको मुख्य विषय नै मौलिकता र समुदाय विशेषको देउसीभैलो भएकाले पोखरा र आसपासमा खेलिने समुुदाय विशेषको देउसी भैलोलाई सहभागिता गराईने उनको भनाई थियो । यसबाट हराउँदै गएको मौलिकतालाई दिगोपन दिने उद्धेश्य हाम्रो छ । जसबाट पर्यटनको राजधानी पोखरामा पर्यटकीय गतिविधि पनि बढाउन सकिने टेलिभिजनले दावि गरेको छ ।

महोत्सवमा पोखरा महानगरपालिका र नेपाल पर्यटन बोर्ड प्रबद्र्धकका रुपमा रहेका छन् । त्यसैगरी गण्डकी प्रदेश सरकार सामाजिक विकास तथा स्वास्थ्य मन्त्रालय, उद्योग, पर्यटन, वन तथा वातावरण मन्त्रालयले सहकार्य गरेका छन् । त्यसैगरी गण्डकी प्रज्ञा प्रतिष्ठान, पोखरा प्रज्ञा प्रतिष्ठान, राष्ट्रिय बाणिज्य बंैक लगायतका संघ संस्थाहरुको सहकार्य रहेको बताइएको छ । महोत्सवमा सहभागी टिमले नगद पाँच हजार नगद प्राप्त गर्नेछन् उत्कृष्ट टिमलाई देउसी भैलो च्याम्पिएन घोषित गरिनेछ । च्याम्पिएन हुने टिमले अवार्ड सहित रु १५ हजार नगद प्राप्त गर्ने आयोजकले जानकारी दिएको छ ।