पोखराको एक फोटो स्टुडियोमा आगलागी हुँदा २० लाखभन्दा बढीको क्षति भएको छ । जनप्रिय क्याम्पस अगाडिको अर्पन क्रियसनमा मंगलबार बिहान आगलागी भएको हो ।

फोटो तथा भिडियोको काम गर्ने स्टुडियोमा आगलागी हुँदा झण्डै २० लाख रुपैयाँ बराबरको क्षति भएको दाबी गरिएको छ ।

स्टुडियोमा रहेका सामग्रीहरु ९५ प्रतिशत बिग्रिएको संचालक फडिन्द्र भण्डारीले बताए । विद्युत् सर्ट भएर आगलागी भएको प्रहरीले जनाएकाे छ । सञ्चालक भण्डारीले इन्टरनेटको राउटर र सिसी टिभिको लाइन बाहेक भित्र अन्य विद्युतिय सामान ‘अन’ नभएको जनाए ।

पसलभित्र तिहारमा बत्ती नबालिएको र बाहिर बालिएको बत्तीले पनि असर गरेको नदेखिएको सञ्चालक भण्डारीको भनाई छ । मर्निङ वाकमा हिँडेका मानिसले धुवाँ देखेपछि वरिपरि खबर गरेर दमकल बोलाई सटर खोलेर निभाएका कारण पसल वरपर थप क्षति हुन नपाएको उनको भनाई छ।

पोखरा वडा नं. २०, भलामका फडिन्द्र भण्डारी ‘अर्पण’ ले विगत ४ वर्षदेखि त्यहाँ सञ्चालन गरिरहेका थिए ।