पोखरा । नेपाल पत्रकार महासंघ गण्डकीका संस्थापक अध्यक्ष तथा तत्कालीन केन्द्रिय सदस्य स्व‍‍‍.त्रिभुवन पौडेलको स्मृतिमा स्थापना भएको अक्षयकोषमा उनका पूर्व सहकर्मी रामचन्द्र राईले १ लाख सहयोग गरेका छन् ।

जापानमा रहेका राईले स्व.पौडेलको निधन भएको १३ दिनमै उक्त रकम सहयोग गर्ने घोषणा गरेका थिए । राईकी छोरी प्राप्ती राई र पत्रकार अपिल त्रिपाठीले उक्त रकमको चेक महासंघका प्रदेश महासचिव गोविन्द सुवेदीलाई सोमबार हस्तान्तरण गरेका हुन् ।

महासंघ गण्डकीले उक्त अक्षयकोष स्थापना गरेको हो । १० लाख राशी रहने कोषमा हालसम्म साढे ४ लाख बढी संकलन भइसकेको महासंघ गण्डकीले जनाएको छ ।

अक्षयकोषको रकम पत्रकारिताको विकासमा प्रयोग गरिने महासंघका महासचिव सुवेदीले बताए । राईले अक्षयकोषको विस्तारका लागि आफुले सुरुआत गरेको बताए । उनले जन्मदिनको अवसरमा रकम पठाएका हुन् ।

स्मृति प्रतिष्ठान गठन प्रक्रिया अघि बढाइयो 

पौडेलको स्मृतिमा त्रिभुवन पौडेल स्मृति प्रतिष्ठान गठन प्रक्रिया अघि बढाइएको छ । पहिलो चरणको छलफलले प्रतिष्ठान गठन गरिने र अध्यक्षमा उनकी धर्मपत्नी प्रतिभा पौडेललाई चयन गरिएको पत्रकार महासंघ कास्कीकी अध्यक्ष बिमला भण्डारीले जानकारी दिइन् ।

मंसीर २३ गते एक कार्यक्रमका बीच प्रतिष्ठानको तदर्थ समिति घोषणा गरिने त्रिभुवनका दाजु चिरञ्जीवि पौडेल (उत्तम) ले जानकारी दिए ।

पत्रकार महासंघ गण्डकीले आफ्ना संस्थापक अध्यक्षको स्मृतिमा अक्षयकोष बनाउने घोषणा दुर्घटनाको केही दिनमै गरेको थियो । कार्यबाहक अध्यक्ष सोनी शर्माको अध्यक्षतामा बसेको बैठकले १० लाख रुपैयाँको अक्षयकोष स्थापना गर्ने, महासंघ गण्डकीले ५ लाख रुपैयाँ तत्काल कोषमा राख्ने र बाँकी ५ लाख रुपैयाँ प्रदेश अन्तर्गतका जिल्ला शाखा र शुभचिन्तकहरुसंग समन्वय गरेर जुटाउने निर्णय गरेको थियो ।

गत वर्ष माघ १ गते काठमाडौंबाट पोखरा आउँदै गरेको यती एयरलाइन्सको जहाज पोखरामा दुर्घटना हुँदा त्यसमा सवार अन्य ७१ जनासँगै ३७ वर्षीय पौडेलको पनि निधन भएको हो ।