पोखराका पत्रकार लक्ष्मीनारायण देवकोटालाई पत्नी शोक परेको छ ।

पत्रकार महासंघ कास्कीका सदस्य एवं प्रेस चौतारी गण्डकीका सदस्य देवकोटाकी धर्मपत्नी सिर्जना पौडेल देवकोटाको ३९ वर्षकै अल्पायूमा निधन भएको हो ।

कास्कीको अन्नपूर्ण गाउँपालिका वडा नं. ६, लुम्ले घर भई पोखरा अर्चलबोट बस्दै आएकी देवकोटा विगत ३ वर्षदेखि आन्द्राको क्यान्सरसँग जुधिरहेकी थिइन् । ३९ वर्षीया उनको पोखराको गण्डकी मेडिकल कलेजमा उपचारकै क्रममा मंसिर १९ गते दिउँसो १ बजे निधन भएको हो ।

काठमाडौंस्थित ओम हस्पिटलमा नियमित चेकजाँच गरिँदै आएकोमा ११ दिनदेखि उनलाई गण्डकी मेडिकलमा भर्ना गरिएको लक्ष्मीनारायणले बताएका छन् । देवकोटा दम्पतीका ९ वर्षीय छोरा र १७ वर्षीया छोरी छन् ।

प्रेस चौतारी, नेपाल कास्की शाखाले एक विज्ञप्ति जारी गर्दै शोक व्यक्त गरेको छ । सचिव रञ्जन अधिकारीले जारी गरेको विज्ञप्तिमा उल्लेख छ – ‘ यस दुःखद् घडीमा स्वर्गीय देवकोटाप्रति हार्दिक श्रद्धाञ्जली अर्पण गर्दै आत्माको चीर शान्तिको कामनाका साथ पत्नीशोकमा रहनुभएका सहकर्मी लक्ष्मीनारायणसहित शोकाकुल परिवारजनमा गहिरो समवेदना प्रकट गर्दछ ।’