काठमाण्डौ। वैदेशिक रोजगारीका लागि विदेश पठाइदिने भन्दै पीडितहरू बाट १० करोड भन्दा बढी रकम उठाएर ठगी गरेको आरोपमा प्रहरीले एक ट्रेनिङ सेन्टरका संचालकलाई पक्राउ गरेको छ।

ललितपुर कोन्ज्योसोम गाउँपालिका- १ बस्ने सी स्टार ट्रेनिङ सेन्टरका संचालक ४७ वर्षीय लाल बहादुर लामालाई १० करोड भन्दा बढी रकम ठगी गरेको आरोपमा सोमबार दिउँसो पक्राउ गरेको हो।

उपत्यका अपराध अनुसन्धान कार्यालय मिन भवनका अनुसार लामाले पीडितहरूलाई लिथुआनिया, क्यानडा, सिंगापुर जस्ता मुलुकहरुमा आकर्षक तलब हुन्छ भन्दै प्रलोभावनमा पारी उनीहरूबाट प्रतिव्यक्ति ५ लाखदेखि १५ लाखसम्म लिएर पनि पठाउन सकेका थिएनन्। भने, पठाएका केही व्यक्तिलाई सिंगापुर पुगेपछि विमानस्थलबाटै फर्काएका थिए।

पछि पीडितहरूले आफूहरु ठगिएको भन्दै वैदेशिक रोजगार विभागमा लामा विरूद्ध उजूरी दिएकोमा फरार रहँदै आएका लामालाई सोमबार दिउँसो साढे ३ बजे काठमाण्डौको शंखमुलबाट प्रहरीले पक्राउ गरेको हो।

पक्राउ पश्चात प्रारम्भिक अनुसन्धानका क्रममा लामाले थुप्रै बेरोजगार युवाहरूबाट १० करोड भन्दा बढी रकम उठाएको र उनले संचालन गरेको ट्रेनिङ सेन्टरमा खानतलासी गर्दा ९९७ वटा राहदानी बरामद भएको प्रहरीले जनाएको छ।

हाल उनीमाथि थप अनुसन्धान तथा कारवाहीको लागि वैदेशिक रोजगार विभाग ताहाचल पठाईएको विभागले जनाएको छ।