घटना १ः यही साता छातीमा दुखाई महसुस भएपछि एक ६४ वर्षीया महिला चरक मेमोरियल हस्पिटल पुगिन् । चेकजाँच गर्दा मुटुको नशा ब्लक भएको देखियो र डा. एस.के. जैसवालको टीमले तुरुन्त कोरोनरी एन्जियोप्लास्टी गरेर मुटुको रक्तनलीको ब्लक खोली बिरामीको ज्यान बचायो ।

घटना २ः तीन साता अघि पनि छाती दुखेर ६८ वर्षीय पुरुष चरक पुगे । उनको पनि मुटुको नशा ब्लक भइसकेको अवस्था थियो । तुरुन्त शल्यक्रिया गरिएपछि ज्यान बच्यो ।

यी पछिल्ला २ उदाहरण हुन् । २ दिन अघि मात्रै हृदयघात भएका ४० वर्षीय युवाको ज्यान अपरेशन गरी जोगियो । छातिको दुखाईलाई सामान्य रूपमा लिई बेवास्ता गर्दा ज्यानै पनि जान सक्ने वरिष्ठ डा. जैसवाल बताउँछन् । समयमै उपचार पाएमा यसरी बिरामीको ज्यान बचाउन सकिने तर ढिलो भएमा ज्यानै जान सक्ने उनी बताउँछन् ।

मुटुजन्य रोग लागिसकेका मानिस जाडोमा बढी जोखिममा हुने उनको भनाई छ । डा. जैसवालका अनुसार रगतमा उच्च कोलेस्ट्रोल, उच्च रक्तचाप, मोटोेपना, मधुमेहका मानिसका लागि जाडो महिना खतरनाक महिना हो । जाडोको कारणले यी रोग बढ्छन् ।

यस्तो समस्या भएका बिरामीले नियमित चेकअप गर्ने र रगतको स्थिति सामान्य राख्नुपर्छ । समयमा नै सचेत बनी आफ्नो मुटुको बेला बेलामा चेकजाँच गर्न उनी सुझाव दिन्छन् ।

पोखरा नागढुंगा स्थित चरक मेमोरियल हस्पिटलमा नेपाल सरकारको विपन्न नागरिक स्वास्थ्य सेवा अन्तर्गत मुटुको उपचार गर्दा १ लाख सम्मको निःशुल्क उपचारको व्यवस्था रहेको हस्पिटलका प्रबन्ध निर्देशक कपिल पोखरेलले बताए ।

गण्डकी प्रदेशकमै पहिलो पटक ओपन हर्ट सर्जरी भएको अस्पताल हो चरक । जहाँ मुटुसम्बन्धी सम्पूर्ण रोगको उपचार सम्भव रहेको पोखरेल बताउँछन् ।

सम्बन्धित समाचारः

गण्डकी प्रदेशमै पहिलोपटक चरकमा ‘ओपन हर्ट सर्जरी’