पोखरा । कास्कीको माछापुच्छ्रे गाउँपालिकामा मंगलबार सञ्चालित निःशुल्क स्वास्थ्य शिविरबाट ३ सय ६७ जना लाभान्वित भएका छन् ।

माछापुच्छ्रे गाउँपालिका कार्यालयले आयोजना गरेको शिविरमा चिकित्सकीय सुविधा र औषधिको प्राविधिक सहयोग पोखरा नागढुंगा स्थित चरक मेमोरियल हस्पिटलले गरेको थियो ।

चरकले यसअघि गोरखा, म्याग्दी, बागलुङ लगायतका स्थानमा पनि पूर्ण सेवा सहितको प्राविधिक सहयोग गरिसकेको छ । प्रबन्ध निर्देशक कपिल पोखरेलले गाउँ गाउँमा यस्ता शिविर सञ्चालनलाई निरन्तरता दिने बताए ।

३६७ मध्ये भिडियो एक्सरे सेवा लिने १६५, मुटुको ईसिजी सेवा लिने १४५, स्त्री रोग सेवा लिने १२५ जना रहेका छन् । ६५ जनामा मुटुको रोग, स्त्री सम्बन्धी रोग लगायतका समस्या देखिएकाले उनीहरूको आगामी उपचार चरकले सहुलियत रुपमा गर्ने भएको छ ।

शिविरमा प्रजनन स्वास्थ्य समस्या सम्बन्धी, भीआइए परीक्षण, पाठेघरको भिडियो एक्सरे, पाठेघर तथा स्तन क्यान्सर सहित स्त्री रोग सेवा, बालरोग सेवा, जनरल फिजिसियन सेवा प्रदान गरिएको थियो ।

चरक हस्पिटलका चिकित्सकहरु डा. सरोज पोखरेल (वरिष्ठ फिजिसियन), डा. एस.के. जायसवाल (वरिष्ठ मुटुरोग विशेषज्ञ), डा. ओमकुमार श्रेष्ठ (रेडियोलोजिस्ट), डा. जुकल श्रेष्ठ (एमड, जीपी, डीएम ईमर्जेनसी मेडिसिन), डा. सुस्मित अधिकारी र डा. सुमिता गुरुङ (मेडिकल अफिसर) ले शिविरमा जाँच गरेको हस्पिटलका पिआरओ सोबित सुवेदीले जानकारी दिए ।

माछापुच्छ्रे गाउँपालिकाका अध्यक्ष मिन बहादुर गुरुङले चरकले ईसिजी, भिडियो एक्सरे सुविधासहित प्राविधिक सहयोग प्रदान गर्दा गाउँबासीको स्वास्थ्य जाँचमा निकै फाइदा पुगेको बताए । उनले यो शिविरलाई निरन्तरता दिने बताए ।

स्वास्थ्य चौकीका अध्यक्ष मधुसुदन अधिकारी, हेल्थ कोओर्डिनेटर डिल्लीराम दाहाल लगायतले कार्यक्रममा बोलेका थिए ।

सम्बन्धित समाचारः

चरकको सहयोगमा दमेक रेडक्रसको स्वास्थ्य शिविर

चरक अस्पतालको सहयोगमा म्याग्दीमा निःशुल्क स्वास्थ्य शिविर
६५० जना लाभान्वित

चरकको प्राविधिक सहयोगमा गाेरखामा निःशुल्क स्वास्थ्य शिविर