पोखरा महानगरपालिका वडा नं. १८ स्थित भावना सामुदायिक कृषि सहकारीले आफ्ना शेयर सदस्यहरुका लागि कफी खेतीबारे तालिम दिएको छ ।

तालिममा ४० जना सेयर सदस्यहरुको सक्रिय सहभागिता रहेको थियो । राष्ट्रिय चिया तथा कफी विकास बोर्ड कास्कीका प्राविधिक नगेन्द्र सुवेदीले प्रशिक्षकको भूमिका निर्वाह गरेका थिए ।

तालिमको समापन गर्दै वडा नं. १८ का अध्यक्ष शिवप्रसाद तिमिल्सिनाले तालिम प्राप्तिपछि कफी बनाउन सक्षम भएको विश्वास व्यक्त गर्दै आयआर्जनसँग सम्बन्धित तालिमहरु सञ्चालन गर्ने बताए ।

कृषिबाट नै आर्थिक रुपान्तरण सम्भव रहेको भन्दै वडाध्यक्ष तिमिल्सिनाले थोरै लगानीमा धेरै उत्पादन लिन सकिने कफी खेतीलाई पर्यटकीय स्थल सराङकोटको ब्राण्ड बनाउनुपर्ने बताए ।

भावना सहकारीका अध्यक्ष बलराम कोइरालाले तालिममा सिकेको सीपलाई निरन्तरता दिन आग्रह गर्दै अरुलाई पनि सिकाउन अनुरोध गरे । उनले सबैभन्दा धेरै कृषि कर्ममा लागेको भावना सहकारी नै भएको दाबी गरे । सराङकोटमा बाँदरले दुःख दिने भएपनि कफी खेतीमा बाँदरले असर नगर्ने भएकाले उपयुक्त खेती भएको बताए ।

यस्तै, तालिमका संयोजक तथा सहकारीका कृषि उपसमिति संयोजक तिलक खड्काले तालिमबाट किसान स्वयम् सक्षम हुनुका साथै किसान आर्थिक उपार्जनमा पनि महत्वपुर्ण भुमिका खेल्ने विश्वास व्यक्त गरे ।

प्रशिक्षार्थीहरुको तर्फबाट बोल्दै अर्जुन थापाले तालिम उपयोगी भएको बताउँदै सिकेको सीपलाई व्यवहारमा लागु गर्ने प्रतिवद्धता व्यक्त गरे ।

वडा सदस्य कल्पना कार्की ढकाल, राष्ट्रिय चिया तथा कफी विकास बोर्ड क्षेत्रीय कार्यालय कास्कीका निर्देशक पवित्रा अधिकारी, दिपक थापा लगायतले मन्तव्य राखेको कार्यक्रम सञ्चालन सहकारीका सचिव मिनबहादुर थापाले गरेका थिए।