पोखरामा चेकजाँचमा खटिएका प्रहरीमाथि मुक्का लात्ती प्रहार गर्ने स्कुटर चालक कारबाहीमा परेका छन् ।

मंगलबार साँझ पोखरा वडा नं. २ फिर्केपुल स्थित पोखरा बाग्लुङ सडक खण्डमा ट्राफिक प्रहरी सहितको राजमार्ग सुरक्षा संयुक्त चेकिङ ड्युटीको क्रममा बागलुङ जैमिनी १ घर भई पोखरा १० बस्दै आएका ३५ वर्षका रामबहादुर थापाले प्रहरीमाथि कुटपिट गरेको प्रहरीले जानकारी दिएको छ ।

पर्स्याङतर्फबाट बाग्लुङ बसपार्कतर्फ आउँदै गरेको ग १३ प ८७२ स्कुटर लापरवाही तबरले आइरहेको देखि उक्त स्कुटर रोकी चेकजाँच गर्ने क्रममा स्कुटर चालक थापाले मादक पदार्थ सेवन गरेको पाइएको र सो सम्बन्धमा ट्राफिक नियम अनुसार कारवाही गर्ने क्रममा थापा प्रहरीमाथि जाइलागेको कास्की ट्राफिक प्रमुख प्रहरी निरीक्षक भानु शर्माले जानकारी दिए ।

वडा प्रहरी कार्यालय बगरका प्रमुख प्रहरी निरीक्षक बोधराज रेग्मीका अनुसार ड्युटीमा खटिएका जिल्ला ट्राफिक प्रहरी कार्यालय कास्कीमा कार्यरत प्रहरी सहायक निरीक्षक भिम बहादुर रानाभाट, प्रहरी हवल्दार लिलाधर सुवेदी र प्रहरी सहायक हवल्दार कश्मीर सिंह साउदसंग अनावश्यक वादविवाद गरी अभद्र व्यवहार देखाई प्रहरी कर्मचारीहरुलाई धकेला धकेल गरी प्रहरी हवल्दार लिलाधर सुवेदीलाई हात मुक्का लात्ती समेत प्रहार गरेका हुन् ।

थापालाई जिल्ला प्रशासन कार्यालय कास्कीबाट सार्वजनिक, हित, स्वास्थ्य, सुरक्षा, सुविधा र नैतिकता विरुद्दको कसुर अन्तर्गत (अभद्र व्यवहार) शीर्षकमा मुद्दा दर्ता गरी अनुसन्धान प्रक्रिया अगाडि बढाइएको प्रहरी निरीक्षक रेग्मीले गण्डकन्यूजलाई जानकारी दिए ।