गोरखा। गोरखामा मलद्वार भित्र अड्किएको बोतल शल्यक्रिया गरेर निकालिएको छ।

गोरखा नगरपालिका वडा नं -३ नारेश्वरका ५७ वर्षीय पुरूषको विगत एक महिनादेखि अड्किएको किटनाशक औषधिको बोतल शल्यक्रिया गरेर निकालिएको हो।

प्रदेश स्वास्थ्य निर्देशनालय गण्डकीले दिएको जानकारी अनुसार एक महिनादेखि मलद्वारमा बोतल बोकेर हिंडेका उनलाई स्वास्थ्यमा गम्भिर समस्या देखिएपछि आज बिहान गोरखा अस्पतालको इमर्जेन्सी कक्षमा भर्ना गरिएको थियो ।

एक्सरे गरेर हेर्दा ठूलो आन्द्रा अवरुद्ध भएर अड्किएको अवस्थामा बोतल देखिएपछि तत्काल दुरबिनबाट हेर्दा आन्द्राको अन्य भागमा संक्रमण नफैलिएको पत्ता लागेपछि अप्रेसन गरिएको थियो।

अप्रेसनका लागि अस्पतालका सर्जनद्वय डा. जितेन्द्र कुमार सिंह, डा. विश्वराज खड्का, एनेस्थेसियोलोजिष्ट डा.शम्भु अधिकारी लगायतका टिमले करिब तीन घन्टाको शल्यक्रिया पश्चात् बिरामिको मलद्वारबाट १०×७.५ सेमीको डब्बा निकाल्न सफल भएको हो।

अचेत अवस्थामा भर्ना भएका उनको शल्यक्रिया पश्चात होस् आएको र उनलाई आइसीयुमा राखेर उपचार गरिएको अस्पताललाई उद्दृत गर्दै निर्देशनालयले जनाएको छ।

यद्यपी, बोतल मलद्वारमा कसरी अड्कियो भन्ने बारे केही खुलाइएको छैन।

तस्बिर : स्वास्थ्य निर्देशनालय, गण्डकी