करदाता सेवा कार्यालय स्याङ्जाले वित्तीय साक्षरता एवं कर सचेतनामूलक कार्यक्रम गरेको छ ।

मंगलबार पुतलीबजार नगरपालिका सदरमुकाम स्थित शहिदचोकमा गरिमा विकास बैंक, स्याङ्जा चेम्बर अफ कमर्श र त्रिभुवन आदर्श नमुना मा.वि.को समन्वयमा उक्त कार्यक्रम सम्पन्न भएको हो ।

कार्यक्रमलाई सम्बोधन गर्दै निमित्त प्रमुख जिल्ला अधिकारी दिपक पौडेलले कर सचेतनालाई प्राथमिकता दिएर कर दायरा फराकिलो बनाउँदै अगाडि लैजानुपर्नेमा जोड दिएका थिए । उनले करका विषयमा हरेक नागरिकलाई स्थानीय तहमा गई जानकार गराउन समेत आग्रह गरेका थिए ।

त्यस्तै, करदाता कार्यालय स्याङ्जाका प्रमुख विजय भुसालले व्यवसायी र उपभोक्ता दुवै सचेत र जिम्मेवार हुनुपर्ने बताउँदै कारोबार गर्दा वैधानिकता अपनाउन आग्रह गरेका थिए । कर कार्यालय व्यवसायीलाई लुट्न नभई वैधानिकता प्रदान गर्न आएको उनको भनाइ थियो । उनले उपभोक्तालाई व्यवसायीबाट सेवा लिदै गर्दा उक्त व्यवसाय दर्ता भए/नभएको, सामान उपभोग गर्न लाएक भए/नभएको तथा उपभोग्य मिति गुज्रिएको छ/छैन भन्ने कुरामा ख्याल गर्नुपर्ने बताएका थिए ।

उनले व्यवसायी तथा नागरिकले जिम्मेवार भएर कर तिरे मात्र देशको विकास र समृद्धि सम्भव हुने बताएका थिए । कार्यालय प्रमुख भुसालका अनुसार यही असार मसान्तसम्म कार्यालयले करिब ६८ करोड राजस्व उठाउने लक्ष्य राखेको बताएका थिए ।

शहिदचोकबाट सुरु भएको प्रभातफेरी हुलाकरोड, ट्राफिकचोक, अभियानपथ, ठाडोलाइन हुँदै शहिदचोकमा पुगेर कार्यक्रममा परिणत भएको थियो । उक्त कार्यक्रममा सचेतनामुलक प्लेकार्ड, ब्यानर र नृत्य समेत प्रस्तुत गरिएको थियो ।

कार्यक्रममा जिल्ला उद्योग वाणिज्य संघ स्याङ्जाका अध्यक्ष महादेव श्रेष्ठ, स्याङ्जा चेम्बर अब कमर्शका अध्यक्ष लोकनाथ रेग्मी, गरिमा विकास बैंक क्षेत्रीय कार्यालय वालिङ्का प्रमुख लेखनाथ भट्टराई र जिल्ला उपभोक्ता मन्च स्याङ्जाका अध्यक्ष राजेन्द्र मरासिनी लगायतले मन्तव्य राखेका थिए । करदाता कार्यालय स्याङ्जाका प्रमुख विजय भुसालको अध्यक्षतामा सम्पन्न कार्यक्रमको संचालन स्याङ्जा चेम्बर अफ कमर्शका महासचिव रिखिराम पौडेलले गरेका थिए ।