सिंह शार्दूल गुल्म आँधिखोला ब्यारेक स्याङ्जाद्वारा नि:शुल्क स्वास्थ्य शिविर गरिने भएको छ ।

स्याङ्जाको पुतलीबजार नगरपालिका -३ स्थित नेपाली सेनाको आँधिखोला ब्यारेकले स्वास्थ्य कार्यालय स्याङ्जा, स्याङ्जा अस्पताल, भिरकोट स्वास्थ्य चौकी र बिरुवा गाउँपालिकासङ्गको समन्वय, सहयोग र सहकार्यमा नि:शुल्क स्वास्थ्य शिविरको आयोजना गरिएको ब्यारेकका सेनानी पुरुषोत्तम कार्कीले जानकारी दिए ।

बिरुवा गाउँपालिका -८ मेथाभुरुङ स्थित भिरकोट स्वास्थ्य चौकीमा यहि जेठ १६ र १७ गते सामाजिक उत्तरदायित्व अन्तर्गत ग्रामीण क्षेत्रमा रहेका नागरिकको स्वास्थ्य परिक्षणका लागि नि:शुल्क स्वास्थ्य शिविर सञ्चालन हुने सेनानी कार्कीले बताए ।

उनले शिविरमा पेट, छाती तथा मुटु रोग, छाला तथा यौन रोग, हाडजोर्नी तथा नशा रोग, आँखा, नाक, कान र घाँटी रोग, स्त्रीरोग तथा प्रसुती सेवा, दन्त चिकित्सक सेवा, विशेषज्ञ टोलिबाट बालरोग सेवा, भिडियो एक्सरे लगायतका स्वास्थ्य सेवा उपलब्ध गराइने जानकारी दिए ।