जिल्ला प्रशासन कार्यालय स्याङ्जाले नागरिकको दु:खमा साथ दिएको छ । हिंड्डुल गर्न नसक्ने अवस्थामा रहेका बिरामीलाई अस्पतालको बेडमै पुगेर नागरिकता दिइएको हो ।

गत जेठ ८ गते स्याङ्जा बिरुवा गाउँपालिका -५ का विमल शर्मा घाँस झार्ने क्रममा रुखबाट खसेर घाइते भएका थिए । उनको मेरुदण्ड भाँचिएर पोखरास्थित मणिपाल एजुकेसन एण्ड मेडिकल ग्रुप प्रा.लि. मा उपचाररत छन् । उनलाई नागरिकता अभावका कारण उपचारका क्रममा पाउने सेवा सुविधा लिन असहज अवस्था रहेको थियो ।

चिकित्सकहरुले मेरुदण्ड भाँचिएकाले शर्मा हिंड्डुल गर्न नमिल्ने राय दिएपछि विशेष परिस्थितिका कारण भौतिक रुपमा उपस्थित गराउन नसकिने भएकाले स्याङ्जा प्रशासन कार्यालयका प्रशासकीय अधिकृत संयोग भट्टराई र नायब सुब्बा राम प्रसाद पौडेलले निजलाई अस्पतालको बेडमै पुगेर नागरिकताको प्रमाणपत्र प्रदान गरिएको प्रशासन कार्यालय स्याङ्जाले जनाएको छ ।

नागरिकको दु:खमा साथ दिने प्रयास मात्र गरेको भन्दै प्रशासकीय अधिकृत संयोग भट्टराईले तत्काल नागरिकता चाहिएको विशेष परिस्थितिका कारण घाइते शर्मालाई अस्पतालको बेडमै नागरिकता प्रदान गरेको बताए ।

जिल्ला प्रशासन कार्यालय स्याङ्जालाई धन्यवाद व्यक्त गर्दै घाइते शर्माले अस्पतालमै नागरिकता पाउँदा आफूलाई निकै खुसी लागेको बताए ।