अवैध लागूऔषध सेवन गरि सार्वजनिक सवारीसाधन चलाउने ६ जना चालकलाई स्याङ्जा प्रहरीले पक्राउ गरेको छ । जिल्ला प्रहरी कार्यालय स्याङ्जा र ट्राफिक प्रहरी कार्यालय स्याङ्जाले संयुक्त रुपमा पुतलीबजार नगरपालिका -४ नौडाँडा लगायत सिद्वार्थ राजमार्गका विभिन्न स्थानमा चेकजाँच गरेको थियो ।

सडक दुर्घटना न्यूनीकरण एवं सार्वजनिक यातायातलाई थप सुरक्षित, मर्यादित र भरपर्दो बनाउने उद्देश्यले सोमबार चेकिङ गर्ने क्रममा लापसे गरि सवारीसाधन चलाउने ६ चालकलाई पक्राउ गरिएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

विभिन्न स्थानमा लागू पदार्थ दुरुपयोग परिक्षण कीट – ड्रग टेस्ट कीटद्वारा लापसे गरे/नगरेको चेकजाँचका क्रममा १८ जना सवारीसाधन चालकहरु मध्ये ६ जना चालकहरुले लापसे गाँजा सेवन गरि सवारीसाधन चलाएको पाइएकोले नियन्त्रणमा लिइएको डिएसपी रानाले बताए ।

पक्राउ पर्नेमा स्याङ्जा पुतलीबजार नगरपालिका वडा नं.-०३ बस्ने ३८ वर्षीय सार्वजनिक बस चालक किरण बहादुर हमाल, कालीगण्डकी गाउँपालिका वडा नं. -०६ बस्ने ३५ वर्षीय टिप्पर चालक गुमन बहादुर दर्लामी, पुतलीबजार नगरपालिका वडा नं. -०३ बस्ने २७ वर्षीय सार्वजनिक अटो चालक अमन अली मिया, पुतलीबजार नगरपालिका वडा नं. -०७ बस्ने २९ वर्षीय सार्वजनिक अटो चालक दिलिप सिंह ठकुरी, पुतलीबजार नगरपालिका वडा नं. -०१ बस्ने ४२ वर्षीय सार्वजनिक ट्याक्सी चालक राम श्रेष्ठ र पुतलीबजार नगरपालिका वडा नं. -०७ बस्ने ३८ वर्षीय सार्वजनिक जिप चालक मंगल बहादुर दर्जी रहेको डिएसपी रानाले जानकारी दिए ।

जिल्ला प्रशासन कार्यालय स्याङ्जाबाट लापसे गरि सवारीसाधन चलाउने चालकहरुलाई `सार्वजनिक हित र नैतिकता विरुद्धको कसुरमा´ मुद्दा दर्ता गरि थप अनुसन्धानका लागि पाँच दिन म्याद थप गरिएको डिएसपी रानाले बताए ।