काठमाडौँ । चाबहिलमा एक पुरुषले आफ्नै शरीरमा पेट्रोल छर्केर आगो लगाएका छन् । आगो निभाउने क्रममा उनको परिवारका अन्य ४ जना पनि घाइते भएका छन् ।

मंगलबार राति काठमाडौं महानगरपालिका–७ चाबहिलका ५५ वर्षका चञ्चलबहादुर सिंहले घरायसी विवादमा आफ्नो जिउमा आगो लगाएको जिल्ला प्रहरी परिसर काठमाडौँले जनाएको छ ।

मंगलबार राति पौने ९ बजे मदिरा खाएर घर आएका चञ्चलबहादुर र उनकी पत्नी विन्दुबीच झगडा भएको थियो । पत्नीसँग झगडा भएपछि उनले शरीरमा पेट्रोल छर्केर आगो लगाएको पाइएको प्रहरीले जनाएको छ ।

चञ्चलबहादुरको जिउमा आगो लागेपछि पत्नी र तीन छोरीले निभाएका थिए । त्यस क्रममा उनीहरु पनि घाइते भएका हुन् । घाइते हुनेमा चञ्चलबहादुर र विन्दुसँगै छोरीहरु सुप्रिया, समृद्धि र सुहानी रहेका छन् । उनीहरु पाँचै जनाको कीर्तिपुरस्थित बर्न अस्पतालमा उपचार भइरहेको छ ।

१६ वर्षकी समृद्धि र २४ वर्षकी सुप्रिया ८ वर्षकी सुहानीको अवस्था बढी गम्भीर रहेको प्रहरीले जनाएको छ । प्रहरीले घटनाको विषयमा अनुसन्धान गरिरहेको जनाएको छ ।