पोखरा महानगरपालिका वडा नम्बर ८ को कुँवर टोलमा शनिबार भएको निशुल्क शिविरमा ४ सय १७ जनाको मधुमेह तथा रगतमा हुने खराब बोसो (टिजी) जाँच गरिएको छ ।

कुँवर समाज समिति, भवानी आमा समूह र युथ अफ कुँवर टोलको आयोजनामा भएको कार्यक्रममा प्राविधिक सहयोग युनाइटेड रेफरेन्स ल्याबोरेटरी प्रालि(युआरएल) पोखराले गरेको थियो । गण्डकी प्रदेशकै पहिलो र एकमात्र आइएसओ प्रमाणपत्र प्राप्त रेफरेन्स ल्याब युआरएलले आफैं र विभिन्न संघ, संस्थाको सहकार्यमा आयोजना गरेको यो १ सय ७५ औं शिविर हो ।

कार्यक्रममा प्राडा करुणा आचार्यले मधुमेह, थाइराइड तथा टिजी हुने कारण र उपाचार पद्धतिहरुमाथि प्रकाश पारिन् । पोखरा ८ का वडाध्यक्ष रुद्रनाथ बरालले वडा कार्यालय र महानगरले जनताको स्वास्थ्य अवस्था सुधार्न योजनाबद्ध रुपमा काम गरिरहेको जनाए ।

युृआरएलका अध्यक्ष ठाकुरप्रसाद पन्तले युआरएलले स्थापना कालदेखि नै सामाजिक उत्तरदायित्व निर्वाह गर्दै आएको जनाए । उनले सर्वसाधारणलाई रोगहरुबारे सचेतनासहित निशुल्क शिविरले रोग लाग्नुअगावै उपचार गर्न र स्वस्थ जीवन बाच्न सहयोग पुग्ने जनाए ।

कुँवर समाज कास्की अध्यक्ष कृष्ण कुँवरको अध्यक्षतामा भएको कार्यक्रममा पोखरा ८ की वडा सचिव सविता ढुंगाना, कुँवर समाज समिति सहसचिव आरती कुँवर, सचिव लक्ष्मी कुँवर, संगम मार्ग महिला समूह अध्यक्ष इन्दिरा लामिछाने लगायतले बोलेका थिए ।