अविरल वर्षाका कारण स्याङ्जाको भिरकोट नगरपालिका स्थित साउण्डीस्थित सिंजाली परिवारको गोठ भत्किँदा चौपायाहरुको मृत्यु भएको छ भने सिंजाली परिवार घाइते भएका छन् ।

भिरकोट -९ साउण्डी बस्ने ६७ वर्षीय चन्द्र बहादुर सिंजालीको २ तले कच्ची गोठमा अविरल वर्षाका कारण भत्किँदा क्षती पुगेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

डिएसपी रानाका अनुसार शुक्रबार बिहान चौपायाहरुलाई कुँडो दिन जाने क्रममा गोठ भत्किँदा चन्द्र बहादुर सिंजाली र उनकी ५८ वर्षीया श्रीमती ठकुकुमारी सिंजाली समेत सामान्य घाइते भएका थिए । उनीहरुको प्राथमिक स्वास्थ्य केन्द्र वालिङ्मा उपचार भईरहेको डिएसपी रानाले बताए ।

सिंजाली परिवारको गोठ भत्किँदा गोठमा रहेका एउटा भैंसी , दुईवटा बाख्राहरुको मृत्यु भएको छ भने अर्को एउटा भैंसी घाइते भएको प्रहरी कार्यालयले जनाएको छ ।