राष्ट्रिय स्वतन्त्र पार्टी कास्कीले पहिरोमा परी ज्यान गुमाएका तीन परिवारलाई आर्थिक सहयोग गरेको छ ।

गएको महिना असार २७ गते अविरल बर्षा सँगै आएको पहिरोले पोखरा महानगरपालिका-१९, पुरुन्चौर, पोखरा-२७, सहेलापाखा र पोखरा-३२, चैनपुरमा पहिरोमा परी ज्यान गुमाएका परिवारलाई आर्थिक सहयोग गरेको हो ।

प्राकृतिक प्रकोपबाट प्रताडित परिवारलाई मल्हमपट्टी लगाउन रास्वपाको विभिन्न तह र तप्कामा रही तत्स्थानमा पुग्नुभएका सदस्यहरुले भेटि स्वरुप र जिल्ला विपद् व्यवस्थापन समितिमार्फत विपद्मा परेकालाई आर्थिक सहयोग गरिएको जिल्ला संयोजक योगराज पौडेलले जानकारी दिए ।

पोखरा-१९ पुरुन्चौरमा पहिरोबाट परिवार गुमाएका पवन परियारलाई पन्ध्र हजार, पोखरा-२७ सहेलापाखाका भीम थापाको परिवारलाई  बाह्र हजार बिस र पोखरा-३२, चैनपुरकी आरती ओझाको परिवारलाई चौध हजार पाँच सय नगद प्रदान गरिएको जिल्ला बिपद् व्यवस्थापन समिति संयोजक राजु राईले जानकारी दिए ।

बिपद् व्यवस्थापन समितिकी कोषाध्यक्ष मिनु कँडेलका अनुसार रास्वपा कास्कीले बिपद् व्यवस्थापन समिति स्थापना गरी यो बर्षातमा हुने प्राकृतिक प्रकोपबाट प्रभावित परिवारलाई नगद तथा जिन्सी सामानसहित नैतिक र भौतिक सहयोग गर्दै अगाडि बढेको छ ।