पोखरा । गण्डकी प्रदेश सरकारले न्यायिक सहजकर्ताका लागि दरखास्त आह्वान गरेको छ । मुख्यमन्त्री तथा मन्त्रिपरिषद्को कार्यालय पोखराको सूचनामा ७१ जना न्यायिक सहजकर्ता माग गरिएको उल्लेख छ ।

सूचनामा गण्डकी प्रदेश भित्रका गाउँपालिका तथा नगरपालिकाको लागि न्यायिक सहजकर्ता छनौट गरी करार सम्झौता गराई कार्य गराउन दरखास्त आह्वान गरिएको बताइएको छ । योग्यता पुगेका नेपाली नागरिकहरूले यो सूचना प्रकाशित भएको मितिले २१ दिन भित्र यस कार्यालयमा आवेदन दिन अनुरोध गरिएको छ।

कानुन विषयमा स्नातक तह उत्तीर्णहरुले यसमा आवेदन दिन सक्नेछन् । छनोट भएकाले शाखा अधिकृत सरहको तलब र सुविध पाउनेछन् ।

यस सम्बन्धी फाराम, कार्य विवरण, पारिश्रमिक, सेवाका सर्तहरू स्थानीय न्यायिक सहजकर्ता (छनौट तथा परिचालन) कार्यविधि, २०८१ मा भएको व्यवस्था बमोजिम हुनेछ ।

स्थानीय तहमा न्यायिक समित रहने भए पनि त्यस अनुसारको जनशक्ति नभएपछि प्रदेश सरकार र स्थानीय तहको सहकार्यमा सहजकर्ता नियुक्त गर्न लागिएको हो ।

यसका लागि सरकारले कार्यविधि बनाइसकेको छ भने बजेट समेत विनियोजन गरेको छ ।

न्यायिक छनोटकर्ता छनोटका लागि पालिकाले अधिकार मागेका थिए । तर प्रदेशबाट छनोट गर्दा सहज हुने भएकाले प्रदेशले नै कार्यविधि बनाएर प्रक्रिया थालेको हो ।