पहिलो पाइला नेपाल, पुतलीबजार स्याङ्जा शाखाले `राष्ट्रसेवक सङ्गको रक्षाबन्धन´ कार्यक्रम गरेको छ । रक्षाबन्धनको दिन पहिलो पाइला नेपाल स्याङ्जाका सदस्यहरुले प्रहरी कार्यालयमा नै गएर रक्षाबन्धनको कार्यक्रम गरेको हो ।

जिल्ला प्रहरी कार्यालय स्याङ्जा र जिल्ला ट्राफिक प्रहरी कार्यालय स्याङ्जामा कार्यरत राष्ट्रसेवक प्रहरी कर्मचारीहरुलाई पारिवारिक अनुभूति दिलाउने प्रयास गर्दै कार्यक्रमको आयोजना गरिएको पहिलो पाइला नेपाल, पुतलीबजार स्याङ्जा शाखाकी संस्थापक अध्यक्ष स्मृति काफ्लेले जानकारी दिइन् ।

सधैं देश र जनताको सेवामा समर्पित परिवारबाट टाढा रहेका प्रहरीलाई चाडपर्वमा पारिवारिक अनुभूतिको कमी नहोस् भन्दै रक्षाबन्धनको कार्यक्रम गरिएको शाखाकी अध्यक्ष सन्ध्या लामिछानेले बताइन् ।

युवा परिवर्तन र समाजलाई एकीकृत गर्दै युवा वर्गमा सामाजिक उत्तरदायित्व वहन गराउन अग्रणी भुमिका खेल्दै आएको उक्त संस्थाले स्याङ्जामा विविध कार्यक्रम गर्दै आएको संस्थाका स्याङ्जा शाखा उपाध्यक्ष पवन मरासिनीले जानकारी दिए ।