पोखराबाट मुस्ताङको जोमसोम जाँदै गरेको यात्रुबस पहिरोमा परेको छ ।

म्याग्दी रघुगंगा गाउँपालिका-२ स्थित बेनी-जोमसोम सडकको सिरुबारी खण्डमा पहिरोमा गुडिरहेको बसमा मंगलबार दिउँसो माथीबाट खसेको ढुंगा लाग्दा दुई जना यात्रु घाइते भएका छन् ।

घाइते हुनेमा बेनी नगरपालिका वडा नं ४ की २१ वर्षीया पूजा खड्का र गुल्मी इस्मा गाउँपालिका वडा नं २ घर भई हाल पोखराको लेखनाथ बस्दै आएका ३२ वर्षीया मीना नेपाली छन् ।

दुवै घाइतेलाई उद्धार गरी उपचारका लागि बेनी अस्पताल ल्याइएको जिल्ला प्रहरी कार्यालय म्याग्दीका सूचना अधिकारी राजन रायमाझीले जानकारी दिए ।

म्याग्दीको रघुगंगा गाउँपालिका वडा नं २ बैसरीमा ग१ख ७७१७ नम्बरको बसमाथि आज दिउँसो करिब २ बजे पहिरो खसेको हो ।

सडक माथिबाट एक्कासि आएको पहिरोसहितको ढुंगाले लागेर साे घटना भएको प्रहरीले जनाएको छ ।

पहिरोसँगै ठूलो ढुंगो बसको ढोकैमा आएर ठोक्किएको थियो ।

बेनी–जोमसोम सडकमा गत वर्षदेखि थपिएको सिरुबारी पहिरोलाई बेनी–जोमसोम–कोरोला सडक आयोजनाले अति जोखिमयुक्त पहिरोको सूचीमा राखेको छ । सडक अवरुद्ध हुँदा हरेक दिन एक्स्काभेटरमार्फत पहिरो पन्छाएर यातायात सञ्चालनमा ल्याउने गरिएको छ ।